Ministru Koordenadór Asuntu Ekonómiku, Joaquim Amaral. Imajen TATOLI/Egas Cristóvão

DILI, 14 janeiru 2021 (TATOLI)—Ministru Koordenadór Asuntu Ekonómiku (MKAE), Joaquim Amaral, husu ba públiku labele rona informasaun katak foos iha armazen Sentru Lojíztika Nasionál (CLN, sigla portugés) no setór privadu la to’o sustenta konsumu nasionál.

“Ita-nia armazen foin lalais simu foos importasaun tonelada 35.000, ne’ebé foin mak ita hasai kuaze tonelada 7.000 ba ajuda umanitária, liuliu dezastre naturál sira no responde pedidu balun. Daudaun ita sei iha tonelada 20.000, naton ba konsumu nasionál. Maibé ida-ne’e ita seidauk konta foos iha armazen setór privadu sira nian,” Ministru Joaquim Amaral, informa ba Agência TATOLI, hodi responde preokupasaun públiku katak foos laiha ona iha merkadu Timor-Lest , iha resintu Parlamentu Nasionál, foin lalais ne’e.

Notísia Relevante: Razaun akizisaun foos Vietname: inserteza situasaun emerjénsia no demanda konsumu nasionál aas

Tuir governante ne’e,  populasaun iha territóriu tomak konsumu  foos kada fulan maizumenus tonelada 11.000, tanba ne’e stock foos iha CLN ne’e sufisente.

“Ha’u hanoin stock foos ne’e ita bele asegura fulan ida to’o tolu, ne’ebé di’ak hela tanba  foos iha armazen iha, no setór privadu nian mós sei iha hela,” nia akresenta.

Tuir Ministru, bainhira nota ona katak stock foos iha merkadu hahú menus, Governu sei halo intervensaun merkadu liuhosi kooperasaun ho setór privadu.

“Ita halo intervesaun atu labele iha espekulasaun folin, katak sira hanoin foos iha armazen laiha ona, ema balun atu hasa’e folin iha merkadu,” nia hatutan.

Daudaun, ekipa MKAE halo hela estudu halo intervensaun merkadu ho objetivu atu estabiliza folin foos iha merkadu.

“Ita haree realidade loja sira  seidauk hasa’e folin, maibé iha grupu balun mak lansa informasaun ida-ne’e, tanba horisehik ekipa sira halo asesmentu ida katak loja boot sira iha Dili sei iha foos sufisiente no seidauk hasa’e folin foos, nune’e husu komunidade labele pániku katak foos laiha ona,” nia Ministru subliña.

Antes ne’e, Iha 22 maiu 2020, Prezidente CLN, Augosto Junior Trindade hanesan reprezentante Governu, selebra kontratu ho Governu Repúblika Sosialista Vietname hodi sosa foos tonelada 30.000 resin no daudaun ne’e foos to’o ona iha Timor-Leste.

Aleinde ne’e, tuir previzaun Ministériu Agrikultura no Peska (MAP), kada tinan bele prodús hare to’o tonelada 78.000, ne’ebé bainhira konverte ba foos sei hetan tonelada 40.200 hosi kolleta iha époka dahuluk.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here