Portavós Komandu Jerál PNTL, Superintendente Xefe, Arnaldo de Araújo. Imajen Tatoli/Eugénio Pereira

DILI, 14 janeiru 2021 (TATOLI)- Hahú hosi loron 8 to’o 14 janeiru 2021, Komandu Jerál Polísia Nasionál Timor-Leste  (PNTL) rejista kazu insidente 44 akontese iha territóriu nasionál.

Portavós Komandu Jerál Polisia Nasionál Timor-Leste (PNTL), Superintendente Xefe, Arnaldo de Araújo, hateten kazu 44 kompostu hosi kazu asalta-malu 11, baku-malu ida, tuda-malu ida, tuda uma rua no kazu violénsia doméstika 13.

PNTL rejista mós kazu eletrisidade soke mate vítima ida ho naran Dinis de Jesus Amaral, tinan 40, iha vítima nia uma  iha Aldeia Halimea, Suku Lawala, Postu Administrativu Tilomar, Munisípiu Covalima, ne’ebé akontese iha tersa (12/01),  tuku 07:00 Otl.

Notísia Relevante : Konsumu ikan, ema ida mate no sia baixa iha ospitál

Vítima nu’udar Profesór Eskola Tékniku Profisionál Akar-Laran, Munisípiu Covalima, mate hafoin halo instalasaun eletrisidade iha nia rezidénsia no matebian parte PNTL entrega ona ba família hodi hala’o serimónia funerál.

PNTL mós rejista, durante semana ne’e, mosu asidente hamutuk 16 inklui asidente tráfegu grave ida ne’ebé akontese iha  kuarta (6/01), tuku 11:00 Otl, entre karreta bus ida soke motorizada Honda Revo FIT iha área Manduki-Atabae rezulta vítima Joaquina Guilhermina, tinan 57, mate fatin.

Vítima entrega ona ba família iha nia hela fatin Suku Saniri, Postu Administrativu Atabae-Bobonaro. Entretantu motorista bus nu’udar mós suspeitu Domingos Maia, tinan 56, hosi Suku Ritabou, Postu Administrativu Maliana-Bobonaro, detein ona iha polísia hodi submete ba investigasaun.

Iha loron 02 janeiru, PNTL liuhosi Unidade Patrullamentu Fronteira (UPF) detein mós kazál Timoroan ne’ebé tama ilegál hosi Fronteira Atambua Indonézia liu Postu UPF, Badut Mean-Batugade.

Abitante na’in-rua ne’e, UPF entrega ona ba parte Ministériu Saúde hodi submete sira  ba konfinamentu obrigatóriu iha fatin kuarentena Motain.

Jornalista   : Eugénio Pereira

Editór         : Francisco Simões

 

HAKEREK NO HATÁN

Please enter your comment!
Please enter your name here