Administradór Munisípiu Viqueque Januario Soares “Boly”. Imajen/Espesiál.

DILI, 14 janeiru 2021 (TATOLI)—Administradór Munisípiu Viqueque, Januário Soares “Boly”, hateten hanesan Administradór Munisípiu Viqueque disponível no iha vontade ho kbiit ne’ebé iha atu hamutuk Governu sentrál hodi bele atinje objetivu.

Notísia Relevante: MAE enkoraja Administradór Munisípiu Viqueque sai lider ba povu

Nia hatutan, atu atinje objetivu ne’e no Timor-Leste atu la’o ba oin tenke presiza Viqueque oan sira-nia kolaborasaun hodi fó liman ba malu atu servisu hamutuk maske iha diverjensia iha ida-idak nia knaar no kbiit rasik.

“Timor-Leste no Viqueque tenke la’o ba oin no sai buras liután, se Viqueque-oan hotu-hotu fó liman ba malu no servisu hamutuk. Iha Viqueque, dala barak ita rona pergunta ida-ne’e, ‘Bainhira mak ita atu la’o ba oin? Ita ne’e atu nune’e hela de’it?”, maibé ohin loron, ha’u fiar ita sei kontinua husu malu ho pergunta ida-ne’e. Ita seidauk bele to’o iha resposta di’ak ida ba pergunta ida-ne’e, se ita seidauk bele haree hetan dalan ne’ebé lori ita ba serbisu hamutuk, tanba Viqueque só bele la’o ba oin se ita Viqueque-oan sira serbisu hamutuk,” Administradór Munisípiu Viqueque, Januario Soares “Boly” hatetn liuhosi ninia diskursu iha serimónia tomada de pose ne’ebé realzia iha Viqueque ne’eb’e Agência TATOLI asesu, kinta ne’e.

Tuir nia, nasaun ida presiza aposta ba setór produtivu sira, nune’e VIII Governu Konstitusionál hahú ninia kompromisu, intelijente no badinas atu lori povu ba dalan ida-ne’e. Tanba ne’e, nia dehan, nu’udar Administradór Munisipiu, nia kompromete nia kbiit no serbisu atu tulun Governu sentrál realiza objetivu importante ida-ne’e.

Administradór Munisípiu Viqueque Januario Soares “Boly” hasai retratu hamutuk ho governante sira hafoin simu tomada de pose. Imajen/Espesiál.

Nia hateten, populasaun mós hatudu entuziasmu makaas ba Governu nia polítika ida-ne’e, tanba ne’e presiza hakaas-aan serbisu hamutuk ho entidade relevante sira hotu iha munisípiu ho lideransa komunitária inklui komunidade sira, atu nune’e Governu nia polítika ida-ne’e sai realidade no hetan duni rezultadu.

“Ha’u hakarak atu aproveita oportunidade ida-ne’e hodi konvida no enkoraja Viqueque-oan hotu-hotu, feto no mane, katuas-ferik sira, joven, labarik sira, no parte akadémiku, Veteranu sira hotu atu ita buka esplora poténsia sira hotu ne’ebé Viqueque iha. Durante ha’u-nia mandatu hanesan Administradór Munisípiu Viqueque, ha’u sei hakaas-aan serbisu hamutuk ho entidade hotu-hotu, iha governu, setór privadu, igreja, sosiedade sivíl sira, atu buka deskobre no esplora Viqueque nia poténsia sira no oinsá mak poténsia sira-ne’e bele lori Viqueque la’o ba oin no kontribui ba Timor-Leste nia sustentabilidade no rezilénsia,” nia dehan.

Atu hetn susesu, Nia dehan, unidade mak sai xave importante ne’ebé tiha ditado portugés ida dehan nune’e, “O Fraco Rei faz Fraca a Gente”. Tan ne’e, nu’udar Administradór hatete nia labele halo milagre sá tan bainhira serbisu mesak-mesak.

“Tanba ne’e, hanesan Administradór Munisípiu, ha’u mai atu ita serbisu hamutuk. Iha biban murak ida-ne’e, ha’u hakarak konvida ema hotu-hotu, timoroan hotu-hotu, Viqueque-oan hotu-hotu iha ne’e ka iha ne’ebé de’it atu mai, ita Hamutuk harii Viqueque ba loron aban ida-ne’ebé buras liu,” nia hateten.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here