Prezidente Konsellu Diretivu INTL, Jaime Fernando dos Mártires Carvalho Correia. Imajen TATOLI/Egas Cristovão

DILI, 14 janeiru 2021 (TATOLI)Prezidente Konsellu Diretivu Imprensa Nasionál Timor-Leste, Institutu Públiku (INTL,I.P), Jaime Fernando dos Mártires Carvalho Correia, informa daudaun mákina hamutuk 18 ne’ebé durante ne’e imprime buletin votu presiza halo manutensaun.

Tuir nia, importante atu hadi’a mákina tanba iha tinan 2022, Governu sei realiza eventu boot hanesan eleisaun Prezidensiál, ne’ebé presiza tebes halo manutensaun ba mákina hirak ne’e.

“Mákina hamutuk 17 mak durante ne’e uza imprime buletin votu, maibé presiza halo manutensaun. Manutensaun ikus liu mak iha tinan-2017 no momentu ne’ebá atu imprime buletin votu ba eleisaun Prezidente Repúblika no Parlamentár nian, to’o mai agora la halo manutensaun tanba Governu kuaze tinan ida moris de’it ho Dotasaun Orsamentu Temporáriu,” Prezidente INTL hateten hafoin simu pose,  iha Palásiu Governu, kinta ne’e.

Notísia relevante: PCM ofisializa estrutura INTL,I.P

Manutensaun ne’ebé durante ne’e kama’an, tanba ne’e agora presiza manutensaun tan nune’e bele utiliza iha tinan oin.

Responsável ne’e mós preokupa ho orsamentu ne’ebé prevee ba instituisaun ne’e iha tinan 2021 kiik tebes.

“Ha’u preokupadu oituan ho orsamentu ne’ebé tinan ne’e ami iha hamutuk $400.000 de’it, halo nusa mak ami bele jere osan ida ne’e atubele halo manutensaun ba mákina sira ne’e. Se ami propoin iha tinan 2022, ha’u-nia preokupasaun mak ne’e tempu sei la to’o ona tanba tékniku no espesialista manutensaun ba mákina sira ne’e sei mai hosi rai-li’ur,” nia hatutan.

Tanba ne’e, Jaime Coreia sujere atu Goovernu liuhosi ministériu tutela tau osan atubele kapasita timor-oan sira ne’ebé mak daudaun ne’e serbisu iha INTL durante fulan-neen to’o tinan-ida, nune’e bele halo manutensaun rasik ba mákina sira.

Iha biban hanesan, Ministru Prezidénsia Konsellu Ministru, Fidelis Manuel Leite Magalhães, husu ba líder INTL atu haree mákina sira ne’ebé presiza halo manutensaun.

“Husu atu haree didi’ak mákina sira ne’ebé iha, ida ne’ebé mak presiza halo manutensaun no ida ne’ebé mak la presiza, haree didi’ak. Ha’u hatene difikuldade barak mak iha ne’e, aleinde manutensaun ba mákina sira INTL mós laiha espasu natón hodi halo serbisu,” nia dehan.

Antes ne’e, instituisaun Estadu ne’e koñesidu hanesan Gráfika Nasionál ne’ebé tutela iha Prezidénsia Konsellu Ministru.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here