Prezidente Agência TATOLI no atuál Vise-Prezidente Asuntu Mídia no Jornalístiku, Manuel Pinto. Imajen Tatoli/Egas Cristovão

DILI 14 janeiru 2021 (TATOLI)—Hafoin simu mandatu ba tinan-haat, Prezidente Konsellu Diretivu Agência Noticiosa de Timor-Leste, Institutu Públiku (TATOLI,I.P), Manuel Pinto, iha ona prioridade importante lima ne’ebé sei konsentra.

Iha kuarta (13/01) ne’e, Manuel Pinto hetan nomeasaun bazeia ba proposta Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, ne’ebé hanesan membru Governu tutela, aprezenta iha reuniaun Konsellu Ministru ho lista únika no hetan apresiasaun másimu hosi ezekutivu sira no aprovasaun.

“Ha’u tenke haree ba rekursu umanu, haree ba jestaun ne’e rasik tanba sai problema, ba atendimentu TATOLI nian, prestasaun serbisu mós tanba problema rekursu umanu no halo jestaun serbisu ne’ebé seidauk optimál tuir misaun no vizaun instituisaun no ikus liu maka komitmentu iha ritmu serbisu ne’ebé TATOLI seidauk hetan,” Prezidente mídia estatál ne’e dehan iha ninia knaar fatin, Farol, kinta ne’e.

Notísia relevante: Governu nomea Manuel Pinto lidera Agência TATOLI

Tuir nia presiza foku ba pontu lima ne’e tanba hamosu serbisu la efetivu no efisiente inklui kualidade no produsaun.

Aleinde ne’e, atuál Vise-Prezidente Asuntu Mídia no Jornalístiku Agência TATOLI ne’e, iha mós prioridade ba tinan 2021 to’o 2022.

“Ha’u define priorodade tinan ida, la hateten 100 dias, maibé ha’u tenke hateten katak ba tinan 2021 ha’u atu konsentra ba implematasaun polítika redasaun, ne’ebé tenke hatudu ona. TATOLI ne’e tenke iha integridade, halo tuir buat ne’ebé iha estatutu, prodús no reforsa sistema kontrolu liga ba problema ne’ebé identifika no hakarak ka lakohi tenke atualiza regra, entaun tenke iha mós sansaun,” nia tenik.

Nia esplika, tanba TATOLI serbisu bazeia ba prestasaun serbisu maka avaliasaun dezempeñu tenke hahú tau iha fatin.

“Ita tenke haree ona indikadór dezempeñu, hafoin suporta ita-nia rezultadu avaliasaun. Presiza halo sinerjia serbisu ein termu planu, organiza hafoin kontrolu,” nia akresenta.

Agência TATOLI iha diresaun boot rua hanesan mídia no jornalístiku no administrasaun finansa.

“Atu halo serbisu ne’e efetivu no efisiente, tenke iha sinerjia iha parte rua ne’e, se parte rua ne’e mak serbisu ketak-ketak, maka redasaun sei labele halo buat ruma tanba laiha suporta hosi administrasaun, nune’e mós administrasaun sei labele eziste kuandu redasaun laiha. TATOLI moris, ninia isin lolon mak redasaun, la’ós administrasaun, tanba ne’e tenke iha sinerjia entre rua ne’e,” nia hatutan.

Aleinde ne’e, TATOLI hakarak introdús sistema servisu transparánsia iha baze iha plataforma online.

“Pur ezemplu, ita la’o presiza ona halo arkivu suratahan barak-barak, sa tan agora Governu promove hela Governu elektróniku, ne’ebé ha’u hanoin ita tenke koko introdús,” Manuel Pinto katak.

Prezidente Konsellu Diretivu ne’e otimista iha mandatu tinan-haat, mudansa dahuluk ne’ebé nia atu halo maka mudansa mentál.

“Ezemplu, ita-nia kultura serbisu maka la efetivu, disiplina serbisu, dadeer ita seidauk hetan enkontru redasaun, tanba ne’e presiza mudansa mentál no tenke iha armonia serbisu hodi serví interese públiku tuir estatutu,” nia realsa.

Eis Jornalista ne’e iha mehi ida, rekursu umanu TATOLI tenke diferente entre mídia nasionál seluk.

“Atu sukat diferénsa Jornalista no funsionáriu TATOLI, mínimu iha integridade a’as liu fali ema iha mídia seluk,” nia tenik.

Sei foka mós hodi hadi’a makanizmu atendimentu iha baze ba nesesidade públiku.

“Ba atendimentu públiku, TATOLI tenke koñese katak informasaun ne’ebé públiku husu ita fó, la’ós ita obriga fali públiku konsumu informasaun ne’ebé iha,” nia subliña.

Agradese konfiansa Governu nomea sai Prezidente Agência TATOLI definitivu

Iha biban  hanesan, Prezidente Konsellu Diretivu Agência TATOLI agradese konfiansa Governu bele nomea ona nia lidera mídia estatál ne’e definitivamente ba mandatu tinan-haat.

“Ha’u agradese ba konfiansa ne’ebé maka Governu fó mai ha’u, espesialmente Ministru Asuntu Parlamentar no Komunikasaun Sosiál, ne’ebé maka hato’o proposta úniku ba Konsellu Ministru hodi hetan apresiasaun no rezultadu ikus nomea ha’u ba mandatu tinan haat hanesan Prezidente definitivu,” Manuel Pinto tenik.

Nia parte apresia konfiansa ne’ebé Governu fó ba nia hodi lidera Agência TATOLI.

“Ha’u konsidera responsablidade ne’ebé maka VIII Governu atribui atu teste ha’u-nia kapasidade iha lideransa no jestaun nu’udar jerasaun foun ida ne’ebé maka Governu fó fiar,” nia dehan.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here