Anin sobu Eskola EBF Aiasa,Balibo, Bobonaro. Imajen/Antonio Goncalves

DILI, 14 janeiru 2021 (TATOLI)—Hahú hosi Janeiru to’o Dezembru 2020, Diresaun Nasionál Asaun Sosiál Eskolár (DNASE) oferese ona apoiu emerjénsia ba eskola rua-nulu (20), hosi proposta haat-nulu resin ualu (48).

Diretór DNASE, Joaquim Martins, hateten desde janeiru to’o novembro 2020 nia parte simu proposta emerjénsia kona-bá eskola sira ne’ebé hetan estragus husi dezastre naturál hamutuk 48, maibé DNASE foin konsege fó apoiu emerjénsia ba de’it  eskola 20, tanba limitasaun ekipamentu emerjénsia iha armazén.

Notísia Relevante :MEJD hahú foti dadus ba eskola ne’ebé estragus iha Baucau

“Eskola 20 ne’ebé mak ita fó ona apoiu emerjénsia ne’e maka eskola Ensinu Báziku Filial (EBF) iha munisípiu Baucau mak  hanesan Darnafa, Bucoli, Kelikai no Osahuna, iha Viqueque maka Webobo, iha  Ermera EBF Kakegoa, Leptu no Tidin-besi,” Joaquim Martins, hateten ba jornalista Tatoli iha serbisu fatin MEJD Vila-Verde, Kinta ne’e.

Hosi proposta 48  ne’ebé DNASE simu, nia dehan, sei falta eskola 28 mak DNASE seidauk konsege responde hodi fó apoiu emerjénsia iha tinan 2020.

“Maibé, ekipa hosi diresaun rasik kontinua halo tan verifikasaun no monitorizasaun ba eskola EBF iha Munisípiu Covalima, Bobonaro, Manatutu, Baucau no Viqueque. Eskola sira ne’e mak hanesan EBF Tobu no EBF Holsa,” nia subliña.

Diresaun prevee ona orsamentu ba 2021, bainhira tama iha vigór mak sei kontinua fó apoiu emerjénsia ba eskola 28 ne’ebé seidauk hetan apoiu.

Tuir nian, eskola sira ne’ebé DNASE kontinua halo hela verifikasaun mak EBF Tobu, Holsa, EBF Darala, EBF Katólika Laisorulai no iha Viqueque komunidade rasik fó ona kontribuisaun hodi konstrui eskola EBF Builale.

Entertantu, ba 2021 nian, Joaquim Martins dehan, sira seidauk simu proposta foun kona-bá eskola sira ne’ebé afetadu ba dezastre naturál, tanba ne’e sei konsentra hela ba dadus 2020 nian.

Notísia Relevante :Governu Distribui Materiál Konstrusaun bá Eskola Públiku Hitu

Jornalista: Tomé Amado

Editór: Agapito dos Santos

HAKEREK NO HATÁN

Please enter your comment!
Please enter your name here