Xefe Estadu Maiór Jenerál F-FDTL, Majór Jenerál Lere Anan Timur. Imajen Tatoli/Antonio Goncalves

DILI, 13 janeiru 2021 (TATOLI)- Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál Lere Anan Timur akompaña hosi Vise Xefe Estadu Maiór Jenerál F-FDTL, Brigadeiru Jenerál Falur Rate Laek, Brigadeiru Jenerál, Koronél Calisto Santos Coli “Coliati”, ohin, iha Palásiu Prezidensiál  hala’o enkontru ho Prezidente Repúblika, Francisco Guterres “Lú Olo” hodi ko’alia vida nasaun nian atu haree espetativa atu lori Timor-Leste labele “mout” iha problema krize moral.

“Ami ko’alia ba Prezidente Repúblika dehan katak, ohin loron Timór, ita nia povu, ita nia juventude, ita nia lideransa atravesa krize ida. Krize ne’ebé ita bolu dekadénsia moral. Moral ne’e komesa tun, moral família ninian, patriotizmu no nasionalizmu,” Majór Jenerál Lere  Anan Timur informa hafoin enkontru ne’e.

Tuir nia haree, ohin loron iha Timor-Leste, sosiedade sira enfrenta problema morál menus, tanba ema barak uza teknolojia la kontrola aan hodi halo família feto-mane barak moris fahe malu.

Problema krize moral hirak ne’e, Komandante Lere identifika akontese iha Instituisaun F-FDTL, PNTL no Instituisaun Governu no membru Governu sira rasik.

Nia dehan, atu haree problema krize moral ne’e, Igreja Katólika mós hola parte importante atu hala’o nia misaun oinsá fó motivasaun ba família hotu-hotu kontribui hametin Estadu Timor-Leste.

Iha parte seluk, Veteranu ne’e mós preokupa ohin loron Estadu Timor-Leste fó projetu ba setór privadu Timoroan barak hetan osan, maibé sira ba investe fali osan iha nasaun sira hanesan Indonézia.

Lere konsidera hahalok setór privadu sira ne’ebé gosta investe iha rai-li’ur la hatudu sira-nia patriotizmu no nasionalizmu hodi hadomi nasaun doben Timor-Leste.

“Ita nia emprezáriu sira podia toma konsiénsia kona-ba vida nasaun nian ne’e, selae Governu lalika fó fali projetu ba emprezáriu sira ne’ebé la hadomi nia rain ne’e. Ami rona balun ba halo otél boboot iha ema nia-rain, sosa rai iha ema nia-rain,” Lere preokupa.

Komandante Lere hakarak, tuir loloos setór privadu sira hetan osan investe fali iha nasaun hodi kria servisu ba joven Timor-oan sira hodi hamenus problema dezempregu iha rai laran.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here