TDD. Imajen Tatoli /Dok

DILI 13 janeiru 2021 (TATOLI) – Ministériu Públiku (MP) liuhosi Prokuradora Bemvinda do Rosário iha nia alegasaun ba kazu arma branka husu ba Tribunál Distritál Dili atu aplika pena prizaun tinan haat ba arguidu ho inisiál FSM.

Tuir faktu ne’ebé arrola hosi MP katak, iha loron 30 dezembru 2018, tuku 01:00 madrugada, iha Darlau, Dili, arguidu ho kondisaun lanu-todan kaer katana iha nia liman hodi taa lezadu ESB nia kabas parte karuk dala-ida, kontinua taa tan iha lezadu nia liman besik kabas dala-ida rezulta kanek no ran sai.

Konsekuénsia husi arguidu nia hahalok ne’e halo lezadu hetan ran no kanek iha kabas parte karuk suku pontu haat.

Motivu husi problema ne’e, tuir faktu ne’ebé aprezenta hosi MP katak tanba iha altura arguidu lanu arguidu hakarak nia ko’alia ema hotu halo tuir de’it, tanba ne’e mosu diskusaun hodi arguidu sira baku-malu.

Arguidu hatene hela katak kaer katana ne’e krime lei bandu, maibé arguidu kontinua halo nafatin.

Iha alegasaun, MP mantein ho akuzasaun ne’ebé iha no prienxe elementu krime. Mezmu arguidu ho lezadu dame-malu ona tuir família, maibé atu prevene aktu arguidu nian ba futuru labele halo tan mak MP husu Tribunál atu aplika pena prizaun tinan haat ba arguidu.

Parte defeza husu tribunal, atu aplika pena ne’ebé justu ba arguidu, tanba arguidu koopera no justisa, foin primeira vez mai iha tribunal.

Hafoin alegasaun parte sira Tribunal adia fila-fali julgamentu ba iha loron 27 juñu tinan ne’e, iha tuku 11:30 Otl, hodi rona desizaun finál.

Prosesu julgamentu ne’e prezide husi juiz koletivu Ana Paula Fonseca, Ivan Suritai, Maria Solana no arguidu hetan asisténsia legal hosi Defensor Públiku.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here