Xefe Estadu Maiór F-FDTL, Majór Jenerál Lere Anan Timur. Imajen Tatoli/Egas Cristovão

DILI, 13 janeiru 2021 (TATOLI) -Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál Lere Anan Timur, husu ba Komandu Polísia Nasionál Timor-Leste (PNTL) ho Ministériu Transporte no Komunikasaun (MTK) atu halo investigasaun kle’an ba Aviaun Austrália ho marka VH-ILJ ne’ebé tula pasiente pozitivu COVID-19 hosi Jakarta-Indonézia atu transporta ba Brisbane- Austrália, maibé tun fali iha Aeroportu Internasionál Nicolau Lobato, Comoro, tersa loraik (12/01).

Lere preokupa aviaun ne’e tun urjente  iha Aeroportu Comoro ho razaun aftur hotu no roda nakfera la’ós justifikasaun ida klaru ba Estadu Timor-Leste tenke deskonfia no investiga hodi hatene loloos informasaun.

“Mina (aftur) la iha ne’e la’ós justifikasaun ne’e kalkula ona, Indonézia semo to’o mai Timór ne’e (aviaun) lori mina (avtur) litru hira tenke hatene ona. Ne’e bosok ita, ha’u la fiar enxe tiha mina ka aftur, atu semo dehan roda kuak hotu. Governu labele taka-matan ba ida-ne’e, liu-liu polísia labele taka-matan, tanba aviaun ne’e tula moras pozitivu COVID-19 ida iha laran,”  Lere afirma ba jornalista, ohin, iha Palásiu Prezidensiál, Dili.

Notísia Relevante : AACTL mak autoriza Aviaun Austrália tun iha Aeroportu Comoro

Maiór Jenerál F-FDTL ne’e hatutan, Timor-Leste nu’udar Estadu iha direitu tenke halo investigasaun ba problema ne’e hodi evita iha futuru labele mosu erru hanesan.

“Ema labele tama arbiru de’it, tanba ne’e kestaun dignidade soberania ita nian,” Lere afirma.

Tuir kronolojia, aviaun ne’e Austrália nian no sai hosi Austrália ba tula ofisiál organizasaun ai-han mundiál (WFP) nian ne’ebé mak sofre COVID-19 iha Jakarta no atu transporta ba Austrália hodi halo tratamentu, maibé tanba problema tékniku aviaun VH-ILJ Learjet LJ60 ne’e tenke refueling tanba flying hours oras haat nian laran tenke tun duni hodi enxe aftur hafoin bele kontinua ba Brisbane-Australia.

Notísia Relevante : Ministru José Agostinho: “Governu iha responsibilidade ajuda umanitária aviaun VH-ILJ”

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here