Katuas no Ferik Idosu (terseira idade) sira forma no tuur hein hela iha Banku hodi simu pagamentu husi governu liu husi Banku Nasional Comersiu Timor Leste. .Imajen TATOLI/Antonio Goncalves.

DILI, 13 janeiru 2021 (TATOLI)—Prezidente Konsellu Administrasaun Institutu Nasionál Seguransa Sosiál (INSS), Longuinhos Armando Leite, apela ba idozu sira katak bainhira sente moras karik labele forma no hamriik sena malu ho idozu sira seluk iha banku atu simu osan.

Notísia Relevante: Pagamentu faze daruak ba idozu sira seidauk finaliza

Longuinhos Armando Leite hatutan, Institutu Nasionál Seguransa Sosiál (INSS) halo ona akordu ho Banku Nasionál Komérsiu Timor-Leste (BNCTL, sigla portugés) hodi selu idozou sira ne’ebé mak moras ka ferik-katuas liu tiha ona ne’e iha sira ida-idak nia uma.

“Ami halo akordu ida ho BNCTL atu selu idozu ne’ebé moras iha sira-nia uma rasik. Tanba ne’e, ferik-katuas sira ne’ebé sente moras, labele mai forma iha banku no to’o ikus kolen no monu hodi publiku kestiona dehan ami mak sala,” Prezidente INSS, Loguinhos Armando Leite, hateten ba Agência TATOLI iha nia knaar fatin Ministériu Solidariedade Sosial no Inkluzaun (MSSI), Caicoli, Dili, kuarta ne’e.

Nia hatutan, bainhira idozu sira hetan moras karik sira hato’o de’it deklarasaun ruma ba Xefe Suku katak idozu ida-ne’e moras, entaun ekipa pagamentu hosi BNCTL ba selu direta iha sira-nia uma.

“Ha’u husu ba benefisiáriu hanesan idozu sira-nian katak labele ansi atu mai antrian iha banku bainhira sente moras. Husu mós ba oan sira atu labele obriga inan-aman ne’ebé mak ferik-katuas liu ona no la augenta atu hamriik kleur, favór hakmatek iha uma no hein banku to’o ita-boot sira-nia hela fatin hodi setór osan,” nia apela.

Nia dehan, basta iha deklarasun hosi Xefe Suku nian ne’ebé relata katak ferik-katuas ida-ne’e moras ka labele hein kleur, mak Institutu Nasion’al Seguransa Sosiál (INSS) sei informa ba banku (BNCTL) hodi ba to’o iha idozu sira-nia fatin.

“Ami sempre halo tuir deklarasaun hosi Xefe Suku sira tanba ami halo ona akordu ho banku atu selu ferik-katuas sira iha uma. Bainhira sira hetan moras ruma. Bainhira deklarasaun hosi Xefe Suku deklara katak ema ida ne’e moras, mak hein de’it bainhira mak banku to’o iha ita-boot sira-nia uma hodi setór osan ba imi,” nia dehan.

Jornalista: Osória Marques

Editór: Cancio Ximenes

 

HAKEREK NO HATÁN

Please enter your comment!
Please enter your name here