Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (13/01). Imajen TATOLI/Egas Cristovão

DILI, 13 jeneiru 2021 (TATOLI)--Governu liuhosi Ministériu Edukasaun, Juventude no Desportu (MEJD) sei asina akordu ho Embaixada Repúblika Koreia no Ajénsia Kooperasaun Internasionál Koreia (KOICA, sigla inglés) hodi implementa projetu iha área desportu.

Relasiona ho selebrasaun akordu ne’e, ezekutivu sira liuhosi reuniaun Konsellu Ministru (KM) deside hodi nomea Ministru Edukasaun, Juventude no Despostu, Armindo Maia, reprezenta Governu Timor-Leste asina akordu refere.

“Konsellu Ministru aprova konteúdu memorandu entendimentu ne’ebé sei asina hosi Ministériu Edukasaun, Juventude no Desportu no Embaixada Repúblika Koreia inklui KOICA relasiona ho projetu dezenvolvimentu desportu ba labarik sira iha Timor-Leste,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun ezekutivu, iha Palásiu Governu, kuarta ne’e.

Portavós Governu ne’e akresenta, projetu ne’e ho hanoin atu promove partisipasaun labarik sira iha atividade desportiva no sensibiliza públiku ein jerál ba dezenvolvimentu infantil liuhosi atividade desportiva.

Liuhosi programa ne’e, estabelese sistema desportiva iha Timor-Leste, reforsu kapasidade jestaun organizasionál no treinadór desportivu juvenil sira liuhosi modernizasaun ba instalasaun desportiva sira.

Projetu ne’e implementa ho valór millaun $6,5, hodi aumenta partisipasaun labarik no joven sira iha desportu, liuliu ba modalidade futeból liuhosi konstrusaun infraestrutura no instalasaun.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here