Ilustrasaun vasina COVID-19. Imajen/Espesiál

DILI, 12 janeiru 2021 (TATOLI)—Ministériu Saúde (MS) liuhosi programa imunizasaun iha Diresaun Nasionál Saúde Públika, estabelese ona zelera malirin iha munisípiu 12  inklui Rejiaun Administrativa Espesiál Oe-Cusse Ambeno (RAEOA), atu rai ai-moruk vasina AstraZeneca (vasina COVID-19), bainhira to’o iha Timor-Leste (TL).

“Ita iha zelera malirin ne’ebé estabelesidu iha munisípiu 12 inklui RAEOA. Ita estabelese iha sentru internamentu, iha ospitál sira ho nia temperatura 20 to’o 80 célsiu. Durante ne’e ita halo vasinasaun ba sarampu rubella no pólio, zelera malirin ita sei iha,’’ Koordenadora Jerál COVID-19 Ministériu Saúde, Odete da Silva Viegas, esplika ba jornalista sira liuhosi konferénsia imprensa iha Palásiu da Sinzas, ohin.

Aleinde ne’e, Servisu Autónomu Medikamentu no Ekipamentu Saúde (SAMES) prepara ona sala malirin rua, no mós UNICEF sei entrega sala hamutuk rua.

“Ba fasildade atu rai vasina sira ne’e apropriadu hela, maibé sei haree aplikasaun ba 80%. Ida ne’e  sei aumenta tan fasilidade,” nia hateten.

Oras ne’e daudaun, parte ministériu presiza haree mak kapasitasaun liliu fó treinamentu ba profisonál saúde  iha ne’ebé kompostu husi médiku, enfermeiru, no parteira sira.

“Depois sira hetan treinamentu, oinsá sira bele jere vasina sira ne’e rasik  no oinsá kontrola temperatura  zelera malirin. Kapasitasaun sei hahú molok ita halo kampaña,” nia hateten.

Iha programa kapasitasaun ne’e, ekipa COVID-19 sei envolve mós lidér komunitária nune’e bele hafasil liután servisu profisionál saúde atu atende komunidade.

“Ami hanoin katak, uza ita-nia ema profisonál saúde, maibé oinsá bele mós envolve lidér komunitária sira atu nune’e bele ajuda profisionál saúde sira identifika ema sira ne’ebé mak ho moras. Ida ne’e mós sei halo desiminasaun informasaun, tanba ami tenki haree númeru tensaun korasaun ne’e hira no ida ne’e hola parte husi dadus preparasaun ba persentazen ne’ebé iha,” Odete hateten.

Jornalista:Felicidade Ximenes

Editór:Agapito dos Santos

HAKEREK NO HATÁN

Please enter your comment!
Please enter your name here