Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (13/01). Imajen TATOLI/Egas Cristovão

DILI, 13 janeiru 2021 (TATOLI)--Ministra Negósiu Estranjeiru no Kooperasaun, Adaljiza Albertina Xavier Reis Magno, halo aprezentasaun ida iha ámbitu reuniaun Konsellu Ministru (KM), kona-ba Timor-Leste ninia prosesu atubele gradua nu’udar país sub-dezenvolvidu ba país ein dezenvolvimentu.

“Hafoin analiza vantajen no desvantajen hodi hatama ba lista nasaun ein dezenvolvimentu, apezar Timor-Leste kualifikadu ona, maibé Konsellu Ministru delibera hodi adia graduasaun Timor-Leste,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun ezekutivu, iha Palásiu Governu, kuarta ne’e.

Tuir Portavós Governu ne’e, daudaun Ministériu Negósiu Estranjeiru no Kooperasaun (MNEK), hamutuk ho liña ministériál relevante sira sei prepara no negosia ho Organizasaun Nasaun Unida (ONU) ba prosesu trazisaun.

“Konsellu Ministru delibera katak di’ak liu ita labele ansi ho prosesu graduasaun ne’e, tanba sei iha implikasaun oioin, hanesan ekonómika no implikasaun barak kona-ba apoiu internasionál ne’ebé maka Timór bele hetan inklui tratamentu preferensiál sira ne’ebé mak Timór sei bele hetan hodi prepara ninia-an no dezenvolvimentu sira bainhira sei kontinua estatutu hanesan país ida sub-dezenvolvidu,” governante ne’e esplika.

Ministru dehan, bainhira Timor-Leste gradua karik bele konsidera hanesan país sira ne’ebé maka ein dezenvolvimentu hela, la’ós ona país menus dezenvolvidu.

“Timor-Leste kualifikadu ba graduasaun agora, maibé Governu prefere atu hadi’a uluk lai ita-nia uma-laran no kondisaun sira antes avansa ba graduasaun,”Fidelis subliña.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here