Pro-Reitor Asuntu Akademiku, UNTL, Miguel Maia dos Santos.Imajen/ Tatoli Egas Cristovao

DILI, 12 janeiru 2021 (TATOLI)—Fakuldade direitu no siénsia ezata Universidade Nasionál Timor Lorosa’e (UNTL), la preparadu atu tuir graduasaun ne’ebé tuir kalendáriu akadémiku sei realiza iha loron 12 to’o 15 janeiru tinan ida ne’e.

Pro-reitór asuntu akadémiku UNTL, Miguel Maia, esplika fakuldade rua ne’e la hatama lista graduandu sira tanba laiha duni preparasaun hanesan fakuldade hitu (7) seluk.

Notísia Relevante :Estudante UNTL 568 prepara ba graduasaun

“Universidade konsidera mós fakuldade rua ne’e laiha ona dalan atu submete sira-nia lista graduandu sira tanba loloos ne’e antes fulan rua sira tenke hatama hotu ona sira ninia lista graduandu,” Miguel hateten ba jornalista sira kampus UNTL, Tersa ne’e.

Miguel informa, iha enkontru konsellu superiór UNTL nian dekanu fakuldade rua ne’e deklara antes ona katak, tinan ida ne’e sira laiha estudante atu gradua tanba ne’e laiha lista ida mak sira aprezenta.

“Tanba ne’e Universidade avansa de’it ho fakuldade hitu ho totál estudante finalista na’in 633,”  nia hateten.

Entretantu, fakuldade hitu ne’ebé preparadu atu simu graduasaun mai husi Fakuldade Agrikultura hamutuk na’in 46, Fakuldade Enjiñaria na’in 59, Fakuldade Edukasaun na’in 295, Fakuldade Medisina na’in 94, Fakuldade Ekonomia no Jestaun na’in 33, Fakuldade Filozofia na’in 12, no Fakuldade Siénsia Sosiál na’in 94.

Notísia Relevante :UNTL sei reforsa pos graduasaun iha futuru

Jornalista:Tomé Amado

Editór: Agapito dos Santos

HAKEREK NO HATÁN

Please enter your comment!
Please enter your name here