Membru FALINTIL-Forsa Defeza Timor-Leste (F-FDTL). Imajen Tatoli/Eugénio Pereira.

DILI, 13 janeiru 2021 (TATOLI)- Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál Lere Anan Timur, informa Komandu F-FDTL sei estabelese tan postu F-FDTL rua iha liña fronteira terrestre entre Timor-Leste no Indonézia.

Notísia Relevante : Jenerál Lere Apela Ba Timoroan Atu Tama Hosi Fronteira Terrestre Ho Dalan legál

Daudaun ne’e, Komandu F-FDTL estabelese ona postu permanente lima iha área Mandoki-Atabae, Batugade, Balibo, Covalima no Oe-cusse nian.

Postu F-FDTL ne’ebé harii ona ho objetivu atu reforsa servisu  Unidade Patrullamentu  Fronteira (UPF) bainhira hala’o vijilánsia iha liña fronteira sira no parte rua koordena malu atu kontrola movimentu abitante sira nian iha fronteira terrestre TL-RI.

“Ami iha postu haat, aban bairua ami sei aumenta tan postu rua iha fronteira atu bele asegura ita nia fronteira,” Majór Jenerál Lere Anan Timur, hafoin hala’o enkontru ho Prezidente Repúblika, Francisco Guterres “Lú Olo” iha Palásiu Prezidensiál, Dili.

Lere informa tan, F-FDTL ho PNTL sei kontinua garante metin implementasaun Estadu Emerjénsia (EE) dasiak hodi evita kuakér sidadaun halo movimentu tama sai ilegál iha fronteira hodi evita propagasaun COVID-19 no kazu krime oin-oin.

Komandu F-FDTL mós informa ba PR Lú Olo kona-ba situasaun atuál iha rai laran la’o di’ak, mezmu iha fatin balun membru Grupu Organizasaun Arte Marsiál (GAM) maka kria problema, maibé situasaun kalma nafatin.

Durante enkontru, Lere dehan, Prezidente Repúblika, Francisco Guterres “Lú Olo” kontinua husu Komandu F-FDTL kumpre misaun hodi servisu ba oin nafatin defende soberania tuir lei.

Komandante Lere alerta mós ba komandante to’o soldadu sira mantein dixiplina hodi kontribui ba prestasaun servisu di’ak serbí Estadu, povu no instituisaun F-FDTL.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here