DILI, 13 janeiru 2021 (TATOLI) – Reprezentante Estadu Unidus Amerika (EUA) iha Timor-Leste liuhosi sira-nia enkarregadu negósiu iha Embaixada EUA, Elias Parra, ohin, iha Palásiu Governu, hasoru-malu ho Ministru Prezidente Konsellu Ministru (MPCM, sigla portugés), Fidelis Manuel Leite Magalhães, hodi ko’alia kona-ba relasaun entre nasaun rua iha area dezenvolvimentu ho mós atualiza informasaun ba programa millennium Challenge Corporation (MCC).
“Enkontru ne’e atu atualiza informasaun sira ba Ministru MPCM kona-ba asuntu oioin ne’ebé misaun Estadus Unidus nian halo iha Timor-Leste espesiál kona-ba programa MCC ne’ebé iha pasu pozitivu,” informa Elias Parra ba jornalista.
Nia dehan haree ba programa ne’e iha pasu pozitivu, maka tinan ne’e nia laran sei asina akordu iha kontinuasaun programa MCC hodi hametin liu tan kooperasaun entre nasaun rua.
“Hanesan diplomata tur ona ko’alia signifika relasaun EUA ho Timor – Leste metin liu tan,” nia afirma.
Constâncio Pinto mak hanesan embaixadór ba ekipa MCC nian. Tanba ne’e ekipa refere mak sei termina programa saida de’it mak sei hala’o iha projetu MSC ne’e.
“Projetu MCC sei foka liu ba edukasaun no saneamentu no osan atu aloka ba programa sira ne’e hamutuk $280,000,000.00,” Elias Parra relata.
Jornalista : Hortencio Sanchez
Editór : Francisco Simões
