Karreta Estadu tula aho-ruin ba interese privadu. Imajen/foti hosi Facebook

DILI, 13 janeiru 2021 (TATOLI)-Komisaun Anti-Korrupsaun (CAC) halo ona identifikasaun ba funsionáriu públiku (FP) ho inisiál FS ne’ebé kondús karreta Estadu ho marka mitsubishi, xapa matrikula 04.162 G tula ahu-ruin (fatuk tasi).

Aktu FS nian uza karreta Estadu tula ahu-ruin  ne’e viral iha rede sosiál  Facebook no hetan kritika maka’as hosi Facebooker sira ho evidénsia karreta Estadu ne’e tola hela ahu-ruin.

Komisáriu Adjuntu CAC ba asuntu Prevensaun no Sensibilizasaun, Luis de Oliveira Sampaio. Imajen Tatoli/Jogerjo Guterres

Adjuntu Komisáriu CAC ba Asuntu Prevensaun no Sensivilizasaun, Luis Oliveira Sampaio, agradese ba partisipasaun públiku nian ne’ebé kontinua ativu sai tilun no matan ba servisu CAC ninian iha kualkér forma atu kontribui ba prevene no kombate korrupsaun.

Nia dehan, iha kazu ida ne’ebé iha ligasaun ho veíkulu Estadu nian públiku durante ne’e akompaña hela CAC nia atividade movimentu sira entaun kualkér tempu sira hetan elementu ka pesoál ruma uza karreta Estadu ba interese pesoál sira partilla kedas.

“Iha momentu ne’e sira haruka informasaun hatutan liu hosi Facebook no WhatsApp ami simu no funsionáriu ne’e nia rasik mai iha CAC hodi halo identifikasaun ona hodi aprezenta razaun”, Luis Oliveira Sampaio informa ba Agência TATOLI, ohin, iha nia kna’ar fatin, Dili.

Nia haktuir, sirkulasaun karreta ne’e tula fatuk tasi hosi diresaun Maubara Liquiça mai Dili iha dalan klaran parte polísia halo apreensaun ne’ebé komunidade mak hetan hodi informa ba polísia no mós ba CAC.

Hafoin halo identifikasaun CAC mós halo esplikasaun ba pesoál funsionáriu ne’e katak asaun ne’ebé CAC halo maneira prevensaun katak utilizasaun karreta Estadu hanesan ne’e lei bandu.

Luis Sampaio la informa detallu kona-ba identidade pesoál funsionáriu públiku  no karreta Estadu ne’e mai hosi instituisaun Estadu  ne’ebé tanba sei asegura segredu justisa.

“Asaun ne’ebé halo hanesan maneira prevensaun tanba hosi rezultadu relatóriu Diresaun Patrimóniu Estadu tinan-tinan hatudu katak osan ne’ebé Estadu gasta ba manutensaun karreta Estadu purvolta $8,000,000.00 to’o $12,000,000.00 bele sa’e maibé agora movimentu komesa diminui iha loron boot sira ita konsege trava,’’ Luis Oliveira Sampaio hateten.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here