Vise Primeiru-Ministru no Ministru Planu no Ordenamentu, José Maria dos Reis. Imajen TATOLI/Egas Cristovão.

DILI, 12 janeiru 2021 (TATOLI)–Vise Primeiru-Ministru (PM) no Ministru Planu no Ordenamentu, José Reis, lori VIII Governu Konstitusionál nia naran, rejeita informasaun espalla iha públiku, ne’ebé mak temi Governu politiza COVID-19 iha Timor-Leste.

“Governu laiha intensaun a’at no laiha intensaun atu politiza situasaun, tanba buat hotu ne’ebé Governu deside atubele kontinua halo prevensaun, desde inísiu COVID-19 mosu iha Timor-Leste, iha marsu 2020 to’o agora, ho intesaun atu salva sidadaun sira hosi pandemia globál ne’ebé afeta ba mundu tomak,” Vise PM deklara iha ámbitu debate entre Governu no Parlamentu Nasionál kona-ba COVID-19, liuliu implementasaun medida Estadu Emejénsia (EE) iha sala plenáriu, tersa ne’e.

Notísia Relevante: PM Taur rejeita deklarasaun Governu ‘fabrika’ COVID-19 molok EE ramata

Governante ne’e rekoñese, pandemia globál ne’e nu’udar ameasa boot ida ba ema-nia vida tanba lori kontájia a’as tebes no kada loron iha aumentu númeru signifikativu afetadu.

Maski produsaun vasina barak ho persentanjen evikásia, maibé kontinua iha kontájia ba mundu tomak inklui Timor-Leste.

“Timor-Leste ho frajilidade iha setór saúde, obriga Governu atu aplika estratéjia sira-ne’ebé ajuda minimiza risku entrada vírus iha rai laran, ne’ebé la’ós ho intesaun seluk ka politiza fali,’’ nia akresenta.

Iha tinan 2020 no 2021, kazu konfirmadu positivu foun COVID-19 hamutuk na’in-18, mak hamosu preokupasaun Governu atu halo medida hodi suspende loke fronteira sira, atividade igreja no labele halibur ema liu na’in-10 hamutuk iha fatin públiku, atu kumpre distánsia sosiál, uza máskáara no garante sanitáriu ka ijiene.

“Maibé, iha públiku hahú mosu politizasaun katak Governu mak bandu atu igreja halo atividade hanesan misa iha ámbitu Natál no tinan foun, maibé ida-ne’e hanesan alerta husi Vaticano atu suspende misa hodi kontribui ba prevensaun COVID-19,” nia akresenta.

Nune’e, Vise PM husu ba sidadaun sira atu kontinua kontribui ba estratéjia ka medida  ezekusaun ba EE da-siak atubele proteje-an, família no sidadaun sira iha teritórriu Timor-Leste hosi COVID-19.

Antes ne’e, Primeiru-Ministru, Taur Matan Ruak, rejeita Governu ‘fabrika’ kazu konfirmadu COVID-19 iha Timor-Leste.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here