Prezidente Autoridade Munisípiu Baucau, Olivio “Bou Lesa” Freitas, halo juramentu iha serimónia tomada de pose ne’ebé akompaña hosi Pároku Manuel Ximenes, SDB. Imajen/Mídia MAE.

DILI, 12 janeiru 2021 (TATOLI)—Ministru Administrasaun Estatál (MAE), Miguel Pereira de Carvalho, ohin, reprezenta Primeiru-Ministru, Taur Matan Ruak, fó pose ba Prezidente Autoridade Munisípiu Baucau, Olivio “Bou Lesa” Freitas nu’udar Prezidente Administrasaun Munisípál foun hodi troka Prezidente Administrasaun Munisipál sesante, Antonio Guterres.

Notísia Relevante: Ekonómia Baucau matak mak presiza promove redusaun karbonu

Miguel Pereira de Carvalho hateten, nia parte sente onradu tanba lori Primeiru-Ministru, Taur Matan Ruak, nia fatin no naran hodi fó posse ba Prezidente Autoridade Munisípiu Baucau hodi hato’o votu susesu ba Prezidente Autoridade Munisípiu Baucau, Olivio “Bou Lesa” Freitas”

“Primeiru-Ministru, Taur Matan Ruak, hato’o votu susesu ba aktu tomada de pose ne’e, ne’ebé hanesan reprezentante Governu sentrál iha munisípiu hodi lidera no dirije Administrasaun Munisipál no asegura funsionamentu servisu Administração Lokál Estadu nian hodi responde atividade sira hotu perante membru Governo ne’ebé responsável ba Administração Estatál,” Miguel Pereira de Carvalho hato’o liuhosi ninia diskursu iha serimónia tomada de pose ba PAM Baucau iha Sentru Konvensaun Baucau ne’ebé Agência TATOLI asesu, tersa ne’e.

Prezidente Autoridade Munisípiu Baucau, Olivio “Bou Lesa” Freitas, hato’o nia diskursu. Imajen/Mídia MAE.

Governande ne’e hatutan, Prezidente Autoridade Munisípiu Baucau foun ne’e sei organiza servisu hotu iha administrasaun lokál Estadu iha koordenasaun ho servisu sentrál Administrasaun Públikaa nian hodi garante katak komunidade sira iha Municípiu Baucau sei hetan prestasaun servisu públiku ida-ne’ebé efetiva, efisiente no equitativa liután.

Iha serimónia tomada de pose ida-ne’e, nia dehan, hakarak hatudu katak liuhosi aktu ofisiál ida-ne’e, Governu hakarak hafoun-fali ninia konfiansa ba Prezidente Autoriadade Munisipál foun, hodi asume kargu nu’udar Governu nia reprezentante lokál iha Munisípiu Baucau no hakarak espresa hanoin ida katak, servisu ne’ebé Prezidente Autoridade foun atu hala’o ba oin ne’e todan, ezijente tebes no ezije esforsu atu ho badinas bele serbí ba ema hotu.

Nia hateten, servisu munisipál sira sei atua iha âmbitu kompeténsia sira-ne’ebé fó ona ba sira hodi kumpre legislasaun em vigor no orientasaun hosi Prezidente Autoridade Munisípiu Baucau liuhosi atividade sira iha sira-nia respetivu Planu Anuál no Planu Plurianual.

“Servisu Munisípiu sira tenke tengki kolabora ba malu no artikula entre sira iha sira-nia atividade  sira no mós artikula ho servisu administrasaun sentrál hodi promove atuasaun unitária, integrada no koerente Administrasaun Públika nian hodi ezecuta PEDN, Programa Governu, Planu Dezenvolvimentu Munisipál no Planu Asaun Anuál,” nia dehan.

Partisipante sira kumpre regra Estadu Emejénsia iha serimónia tomada de pose ba PAM Baucau, hodi aplika distánsia sosiál. Imajen/Mídia MAE.

Governu liuhosi MAE dezafia Presidente Autoridade foun no komponente sira hotu iha Munisipiu Baucau, atu konsentra nia matenek no abilidade hodi artikula “prosesu konstrusaun poder lokál demokrátiku Timor-Leste nian” iha nível lokál hodi implementa prinsípiu boa governasaun iha atuasaun Administrasaun Lokál Estadu iha Munisípiu Baucau.

“Ha’u lori Governu nia naran hato’o agradese ua’in ba PAM Baucau sesante, Antonio Guterres, ne’ebé ramata ona nia knaar ho di’ak, no nia kontribuisaun durante tinan naruk iha nia servisu ho povu Baucau,” Ministru Administrasaun Estatál (MAE), Miguel Pereira de Carvalho hateten.

Jornalista: Osória Marques 

Editór: Cancio Ximenes

HAKEREK NO HATÁN

Please enter your comment!
Please enter your name here