Membru Polísia sira halo pasa revista ba movimentu sidadaun sira ne’ebé lori transporte la kumpre regra Estadu Emerjénsia dasiak. Imajen/PNTL

DILI, 12 janeiru 2021 (TATOLI)–Komandu Polísia Munisípiu Dili detein Timoroan na’in-21 tanba la kumpre no viola regra implementasaun Estadu Emerjénsia (EE) ba-dasiak.

Ema hirak ne’e, PNTL detein iha sela Polísia, Caicoli, Dili, bainhira halo operasaun sosializa no sensibiliza implementasaun EE no regra saúde públiku iha kapitál Dili hodi luta kontra pandemia COVID-19.

Komandante PNTL Dili, Superintendente Xefe, Henrique da Costa, husu konsiderasaun no konsiénsia komunidade sira ne’ebé halo atividade negósiu iha merkadu, supermerkadu, no fatin públiku sira atu kumpre regra, tanba COVID-19 la’ós buat halimar no hameta ona ema tokon iha mundu.

“Ita detein ona sidadaun na’in-21 ne’ebé halo ona prosesu ba investigasaun kriminál nasionál, tanba la kumpre regra saúde nian ne’ebé Ministériu Saúde fó sai hanesan la uza máskara, la kontrola distánsia sosiál no la rona polísia,” Komandante Henrique hateten ba jornalista, ohin, iha Komandu PNTL, Caicoli, Dili.

Nia afirma, regra Estadu Emerjénsia dasiak ne’e implementa atu ema hotu- hotu kumpre, ba sidadaun sira ne’ebé lakohi kumpre tenke prosesa tuir lei.

“Ba oin ne’e ita sei rigorozu liután aplika medida ruma komunidade sira ne’ebé lakohi kumpre regra,” nia apela.

Estadu Emerjénsia ba-dasiak ne’ebé renova ne’e abranje ba territóriu nasionál tomak hahú vigora hosi tuku 00:00, loron 3 janeiru 2021 to’o tuku 23:59, loron 1 fevereiru 2021.

Dekretu Governu nian ne’e rekomenda katak, ema hotu- hotu ne’ebé la sujeita ba izolamentu  obrigatóriu no ne’ebé la ezerse kuakér atividade profisionál  ka dispensadu hosi devér atu marka prezensa iha servisu fatin, tenke hela iha uma no so bele sai hosi uma bainhira presiza.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here