Prezidente Autoridade Munisípiu Baucau, Olivio “Bou Lesa” Freitas. Imajen/Espesiál.

DILI, 12 janeiru 2021 (TATOLI)–Prezidente Autoridade Munisípiu Baucau, Olivio “Bou Lesa” Freitas kongratula prezidente sesante António Augusto Guterres hamutuk ho nia ekipa tomak ninia servisu no dedikasaun tomak ne’ebé durante ne’e hala’o.

Notísia Relevante: Bou Lesa: “Lideransa di’ak tenke promove no tau matan ba povu”

“Ha’u kongratula prezidente sesante ho ekipa nia servisu no dedikasaun ne’ebé mak durante ne’e nia lidera no konta mós ho ha’u rasik. Ita hotu iha mahon Autoridade Munisípu Baucau, sei fó mahon nafatin no servisu ba povu Baucau,” Prezidente Autoridade Munisípiu Baucau, Olivio “Bou Lesa” Freitas iha iha ninia diskursu iha serimónia tomada de pose ba Prezidente Autoridade Munisípiu Baucau iha Sentru Konevensaun Baucau ne’ebé Agência TATOLI asesu, tersa ne’e.

Nia hateten, maske mandatu bele ramata maibe presiza parte hotu-hotu nia kontribuisaun no kolaborasaun mak bele dezenvolve no bele atinje objetivu povu Baucau nian.

“Ita hotu sei hamutuk no koopera malu hodi dezenvolve Baucau. Sein ita-bo’ot sira, mak prosesu sei la atinje objetivu povu Baucau nian. Nune’e, ho umilidade, ha’u agradese tebes ba ekipa selesaun ba Administradór Munisipál no Autoridade Munisipál sira, Ministériu Administrasaun Estatál (MAE) tanba sira-nia responsabilidade, dever, matenek, badinas no dedikasaun tomak mak prosede selesaun no ha’u selesionadu nu’udar Prezidente Autoridade Munisípiu Baucau ba mandatu tinan lima nian,” nia dehan.

Nia dehan, hahú ohin, Autoridade Munisípiu Baucau sei la la’o mesak maibé sei servisu hamutuk ho MAE no delegasaun teritoriál destakadu, Servisu Munisipal, Parseiru Dezenvolvimentu Nasionál, Internasionál, Autoridade Lokál, Konsellu Veteranu, Setór privadu, Sosiedade Sívil, Organizasaun Baze Komunitária no sira seluk iha ámbitu dezenvolvimentu munisipál no libertasaun ba povu Baucau.

“Hahú hosi ohin, ha’u sei sai Prezidente Autoridade Munisípiu ba povu Baucau tomak no la’os ba família ka grupu ruma, nune’e bele liberta povu Baucau hosi problema sira iha tempu servisu, minutu ida, realiza tarefa orientadu ba rezultadu hahú husi governasaun ida di’ak no  jestaun administrativa ida di’ak. Governasaun di’ak promove partisipasaun públika, justisa, igualdade, transparénsia, responsabilidade, efisiénsia no efikásia, kontrolu, profisionalizmu no responsabilizasaun. Governasaun di’ak tenke evita korupsaun, subornu, konluiu, partisipasaun ekonómika iha negósiu, konflitu interese, administrasaun danoza, abuzu ba poder, ilegalidade no inkompeténsia,” Olivio hateten.

Nia esplika, jestaun administrativa ida di’ak presiza promove planeamentu ho faktu no evidénsia sientífiku multisetoriál, haburas no hakbiit mós jestaun rekursu sira no orsamentasaun, finansa no kontabilidade ho efisiente, ekonómiku, efikaz, rigorozu no orientadu ba povu Baucau nia nesesidade no problema estratéjiku no estruturál sira.

“Hosi jestaun administrativa di’ak, ita espera bele akontese mudansa no impaktu sira hosi utilizasaun rekursu ba povu nia moris. Jestaun administrativa ida di’ak tenke organiza no funsiona autoridade munisipál Baucau ho di’ak,” nia hateten. 

Tuir nia, governasaun no jestaun administrativa de’it la sufisiente atu liberta povu no lori Baucau hetan progresu maibe tenke haforsa ho kualidade lideransa.

“”Kualidade lideransa tenke buras iha povu, Konsellu Veteranu no Kombatente Libertasaun Nasionál, autoridade lokál no lia-na’in sira, joven no intelektuál sira, funsionáriu, apoiu tékniku, Xefe no Diretór sira, Administradór Postu-Administrativu sira, Sekretáriu no Prezidente Autoridade Munisipál rasik inklui parseiru no kolaboradór sira hotu,” nia dehan.

Nia esplika, kualidade ne’e bele observa iha karakter no atitude pozitivu, responsabilidade, inisiativa, auto-disiplina, komunikasaun no relasionamentu ne’ebé mak di’ak.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here