Ilustrasaun vasina COVID-19. Imajen/Espesiál

DILI,12 Janeiru 2021 (TATOLI)—Ministériu Saúde(MS) hamutuk ho ministériu sira ne’ebé envolve iha ekipa prevensaun Covid-19, sei halo advokasia ba komunidade no halo kampaña imunizasaun ba vasina AstraZeneca iha fulan-maiu tinan ne’e.

“Bainhira vasina AstraZeneca ne’e to’o mai Timor-Leste ita sei la halo vasina ba ema hotu, maibé ita hahú husi 20%. Hosi 20 % ne’e, sei halo ba sira ne’ebé tama iha alvu mak hanesan profisionál saúde PNTL, FFDTL, jornalista no mós ema sira ne’ebé serbisu ba eletrisidade, água no saneamentu. Ida ne’e mak sei hetan uluk vasina,’’ Kordenadora Jerál Covid-19 Minsitériu Saúde, Odete da silva Viegas hateten ba jornalista sira liuhosi konferénsia imprensa iha Palásiu das Sinzas, ohin.

Notísia Relevante:MS sei aprezenta planu sosa AstraZeneca ba KM

Koordenadora jerál ne’e dehan, hosi 20% ne’e, 5% ba ema sira ne’ebé iha risku, hanesan ema sira ne’ebé mak hipertensaun, moras fuan, diabetes, kankru, no 80% ba ema sira ne’ebé mak idade liu 60.

“Iha vasina ne’e ita sei halo ba iha faze rua. Halo tiha vasina dahuluk, depois semana tolu to’o semana haat mak ita aplika ba iha vasina segunda faze. Ema ne’ebé mak atu hetan vasina uluk ne’e hamutuk 273,’’ Kordenadora Jerál Covid-19 ne’e esplika.

Odete subliña, vasina ne’e hanesan mós ho vasina baibain ne’ebé halo kampaña imunizasaun nasionál iha tinan 2015 to’o 2016, ezemplu hanesan vasina ba sarampu, rubella no póliu.

Kona-ba vasina AstraZeneca ne’e nia laiha efeitu ne’ebé la’ós boot, normalmente halo isin manas mak sei iha, bainhira iha duni efeitu ne’ebé grave, maka Organizasaun Mundiál Saúde (OMS) no péritu sira sei hato’o, tanba Ministériu Saúde mós iha ona departementu vizilánsia ne’ebé mak estabelesidu sei haree ba efeitu sira ne’e.

“Kona-ba atu sosa vasina ne’e rasik 20% husi parseiru no 80% finansia husi ita nia Governu. Agora orsamentu ba Covid-19 iha Ministériu Súde purvolta millaun 7. Entaun, ida ne’e karik sei hola parte nune’e mós Governu sei haree ba ida ne’e. Tanba orsamentu Covid-19 ne’e rasik sei iha orsamentu ne’ebé apropriadu,’’ Odete esplika.

Notísia Relevante:aPrevene COVID-19, TL sei implementa vasina AstraZeneca ba ema hotu

Jornalista: Felicidade Ximenes

Editór: Agapito dos Santos

HAKEREK NO HATÁN

Please enter your comment!
Please enter your name here