Ilustrasaun COVID-19. Imajen/Espesiál

DILI, 12 janeiru 2021 (TATOLI)—VIII Governu Konstitusionál kontinua esforsu ho aplikasaun medida ezekusaun Estadu Emerjénsia (EE) rigór atu prevene sidadaun labele lakon vida tanba COVID-19.

“Governu implementa medida ezekusaun hahú Estadu Emerjénsia dahuluk to’o da-siak , ne’ebé ita hotu rekoñese to’o agora seidauk iha ema ida maka mate no hakarak garante Governu kontinua halo esforsu ba medida prevensaun atu pandemia globál labele kontájia no hamate sosiedade,” Vise Primeiru-Ministru (PM) no Ministru Planu no Ordenamentu, José Maria dos Reis, iha debate Governu ho Parlamentu Nasionál, kona-ba COVID-19, liuliu implementasaun medida EE, iha sala plenáriu, tersa ne’e.

Notísia Relevante: EE da-siak: viola medida ezekusaun sei asume responsabilidade kriminál

Daudaun ne’e mundu tomak inklui Timor-Leste afetadu ba pandemia globál ne’e no sai ameasa boot ba ema-nia vida tanba risku kontájia a’as tebes.

Kazu pozitivu COVID-19 iha Timor-Leste, ne’ebé aumenta ba 18 iha fulan dezembru nia laran, halo preokupa sosiedade inklui Governu atu buka solusaun imediata atubele responde no prevene situasaun ho intesaun atu salva populasaun.

Tanba ne’e, Goveru foti medida sira hanesan labele halibur ema liu na’in-10 no asegura distánsia sosiál, uza maskára no fase liman bebeik.

Aliende ne’e, temporariamente enserra movimentasaun fronteira to’o loron 14 janeiru no iha posilibilidade atu estende tan bainhira situasaun ejize no limita sirkulasaun internasionál, exeptu ba korpu diplomátiku, servisu umanitáriu no funsonáriu sira-ne’ebé ligadu ba setór petrolífera no ba evikasaun médiku.

Governu aprova ona impoin sanitáriu ida iha Rejiaun Administrasaun Espesiál Oe-cusse no Ambeno (RAEOA) tanba kazu sira ne’ebé identifika iha rejiaun ne’e no atu halo prevensaun ba saúde públika populasaun no evita atu iha transmisaun komunitária iha terirórriu nasionál.

“Ita hotu hatane katak iha momentu ne’e iha ema na’in-tolu ne’ebé ita deteta no tama ilegálmente, maibé konsege lori filafali ba kuaretena atu hetan tratamentu no ohin iha Oé-cusse rezultadu negativu hotu,” nia akresenta.

Deside mós la taka estabelesimentu komérsiál sira no permite funsionamentu merkadu sira ho prestasaun servisu ho implementasaun adesaun medida prevensaun ne’ebé mensiona hodi bele redús impaktu sósiu ekonómiku.

 Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here