Ministru Petróleu no Minerál, Víctor da Conceição Soares. Imajen Tatoli/Egas Cristovão

DILI, 12 janeiru 2021 (TATOLI)–Ministru Petróleu no Minerál, Víctor da Conceição Soares, hateten projetu tasi mane sei tama estudu planu ordenamentu teritórriu ne’ebé hala’o hosi Ministériu Planu no Ordenamentu (MPO) hodi bele hala’o definisaun ba área industriál no komérsiu no agrikultura.

“Ha’u hanoin projetu tasi mane, daudaun halo hela planu atu halo estudu integrál iha planu ordenamentu teritórriu tanba uluk ne’e halo estudu izoladu ka ketak-ketak, ne’ebé laiha relasaun ho projetu seluk,” MPM Víctor, informa iha ninia knaar fatin, Bebora, Dili, foin lalais ne’e.

Notísia Relevante: Governu prioritiza planu ordenamentu territóriu

Tuir governante ne’e, razaun halo estudu integrál, tanba daudaun halo hela planu teritoriál atu halo definisaun ba projetu industriál, liuliu deside iha fatin ne’ebé mak di’ak liu.

“Agora estudu sira halo kona-ba ordenamentu teritórriu atu integra hotu projetu tasi mane inklui projetu sira seluk, purtantu ne’e Ministériu Planu no Ordenamentu mak halo. Ami-nia serbisu maka atu buka riku-soin sira iha tasi laran no rai-maran hodi ema mai investe iha rai-laran,” nia akresenta. 

Dokumentu ba estudu tasi mane, nia dehan, Autoridade Nasionál Petróleu no Minerál (ANPM) no Timor Gás no Petróleu (Timor GAP) inklui empreza sira halo tuir ida-idak ninia interese, ne’ebé Governu presiza halo estudu fali ba projetu refere.

Antes ne’e, Vise Primeiru Ministru no Ministru Planeamentu no Ordenamentu, José Maria dos Reis, hateten nia parte seidauk haree estudu viabilidade ruma kona-ba projetu tasi mane, liuliu dada kadoras mai Timor-Leste.

Tuir nia, projetu boot rua ne’ebé nia iha koñesimentu maka hanesan Suai Supply Base no Auto Estrada ne’ebé hanesan ferramenta importante, maski nia hatene lori kadoras mai Timor-Leste hanesan kompromisu Estadu.

Iha tinan 2020, alokasaun orsamentu ba projetu tasi mane amutuk millaun $2 no iha tinan 2021 sa’e ba millaun $8,5, tanba Governu konsidera hanesan programa importante tebes ba dezenvolvimentu iha kosta súl, liuliu atu lori kadoras mai Timor-Leste.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here