Polísia Unidade Tránzitu prende karreta Toyota Rava, númeru matrikula A13442 iha area Hudi-laran tanba kontra sinais tránzitu, kinta 07 janeiru 2021. Imajen Tatoli/António Gonçalves

DILI, 12 janeiru 2021 (TATOLI)–Komandante Polísia Munisípiu Dili, Superintendente Xefe, Henrique da Costa, alerta ba inan-aman sira atu bolu atensaun ba oan sira menoridade la bele kondús transporte iha sidade Dili.

Notísia Relevante : 2020, akontese kazu krime 1.694 iha Dili

Komandante Henrique da Costa, afirma perigu tebes ba menoridade sira bainhira kondús transporte bele hasoru asidente tráfegu hodi rezulta sira sofre kanek no mate.

“Apela ba inan-aman sira, kuidadu!, tanba ita-boot sira fó transporte karreta ka motór ba ita-boot sira-nia oan ho menoridade lori transporte la’o livre ba mai kuandu hasoru dezastre ruma oinsá, tanba lei tránzitu mós la autoriza menoridade atu kondús transporte,” hateten Henrique da Costa, ba jornalista, ohin, iha Komandu PNTL, Dili.

Tuir dadus ne’ebé Komandu PNTL, Departamentu Nasionál Tránzitu no Seguransa Rodoviáriu Nasionál rejista iha tinan 2020, ema na’in na’in-78 maka mate no barak kanek. Vítima sira ne’ebé maioria ho idade juventude no menoridade sira.

Iha Munisípiu Dili, PNTL halo operasaun pasa revista nota, estudante minoridade sira lori motór la uza kapasete, inklui motór uza kanu lian boot, sobu motór nia xapa no asesória viola regra tránzitu nian.

Komandu Polísia Munisípiu Dili liu hosi Seksaun Tránzitu koopera mós  Departamentu Tránzitu Seguransa Rodoviáriu Nasionál Komandu Jerál PNTL durante ne’e halo operasaun pasa revista ba estudante sira inklui sosializa regra tránzitu nian ba eskola públiku no privadu sira iha Dili.

Jornalista   : Eugénio Pereira

Editór        : Francisco Simões

 

HAKEREK NO HATÁN

Please enter your comment!
Please enter your name here