Ospitál Lahane, Dili, iha faze reabilitasaun, ne’ebé kuaze konklui. Imajen/GPM

DILI, 11 janeiru 2021 (TATOLI)Primeiru-Ministru (PM), Taur Matan Ruak, akompaña husi Ministra Saúde, Odete Maria Freitas Belo, no Vise-Ministru, Bonifácio Maucoli dos Reis, hala’o observasaun ba reabilitasaun Antigu Enfermaria Pediatria, Ospitál Dr. António Carvalho, Lahane, hodi haree besik progresu.

“Ministériu Saúde iha tempu kotuk liubá halo reabilitasaun fatin ida-ne’e, entaun ha’u mai haree. Ha’u kontente ho emprezáriu timor-oan sira ne’ebé halo obra ne’e no husu Ministériu Saúde buat sira ne’ebé seidauk kompleta ne’e, serbisu lalais oituan para kompleta,” Xefe Governu hateten hafoin halo observasaun ba progresu ospitál ne’e iha suku Lahane, munisípiu Dili, segunda ne’e.

Reabilitasaun ne’e nu’udar preparasaun Governu iha tinan kotuk bainhira Timor-Leste hasoru hela situasaun COVID-19, ho objetivu atu uza ba sala izolamentu pasiente infetadu, karik Timor-Leste iha kontájiu pozitivu ne’ebé grave.

Primeiru-Ministru, Taur Matan Ruak, halo vizita ba Ospitál Lahane, segunda (11/01). Imajen/GPM

Hafoin halo observasaun, Xefe Governu hatudu nia laran kontente ho onra tanba ho kualidade di’ak no aproveita husu atu aselera parte kiik ne’ebé seidauk hotu, nune’e bele utiliza iha tempu badak.

“Ita labele hada moras sira iha Hospital Nacional Guido Valadares (HNGV) barak liu tanba dala ruma espasu la to’o, tanba ne’e kuandu ramata ona provavelmente bele uza, la’ós de’it ba moras normál maibé karik kazu COVID-19 ne’e aumenta, Ministériu Saúde iha ona fatin,” nia akresenta.

Iha biban ne’e, Xefe Ezekutivu husu ba Ministra Saúde ho ninia ekipa, atu halo rehabilitasaun ba parte leten (Ospitál Lahane) ne’ebé seidauk reabilita, nune’e bele transfere moras kontájiu sira iha HNGV ba fatin ne’e, tanba ospitál nasionál daudaun ne’e ladún iha ona espasu.

Antigu Enfermaria Pediatria ne’e, reabilita husi kompañia Hedge Construction Unipessoal Lda. iha maiu 2020 ho fundu COVID-19 hamutuk $450,153.32.

Daudaun ne’e progresu reabilitassun fíziku hotu ona inklui monta hotu ona osijéniu paralelu ba kada sala, Ar Kondisionáriu (AC), instalasaun eletrisidade internu inklui lampu sira, enkuantu sei falta mak jardín, koneksaun ba liña eletrisidade no moru hale’u.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here