DILI, 11 janeiru 2021 (TATOLI)–Komandu Polísia Munisípiu Dili kontinua halo patrullamentu ba transporte públiku sira ne’ebé tula pasajeiru iha kapitál Dili atu labele liu ema na’in-10.
Komandante Polísia Munisipiu Dili, Superintendente Xefe Henrique da Costa, informa operasaun konjunta ne’e kompostu Ministériu Saúde, Autoridade Munisípiu Dili no ekipa PNTL halo ba transporte públiku no privadu sira ne’ebé tula pasajeiru liu ema na’in-10 sei hetan apreensaun no selu multa ba Estadu.
Ekipa ne’e mós kontinua tama sai merkadu, loja, supermerkadu no fatin públiku sira hanesan banku sira iha Dili atu prepara bee-moos no sabaun atu fasilita vizitante no kliente sira fase-liman.
“Se liu, ita-nia polísia tránzitu sira iha dalan haree sei hatún, se sira la kumpre ita sei foti medida tuir lei,” Henrique hateten ba jornalista, ohin, iha Komandu PNTL, Dili.
PNTL ho ekipa Ministériu Saúde uza mós karreta hodi sensibiliza informasaun ba abitante sira kona-ba regra Estadu Emerjénsia ba-dasiak iha bairru hotu iha kapitál Dili.
PNTL mós kontinua kontrola sidadaun sira labele halo serimónia festa, graduasaun no lia adat hodi evita COVID-19.
Jornalista : Eugénio Pereira
Editór : Francisco Simões
