Ministru Transporte Komunikasaun, José Agostinho da Silva. Imajen TATOLI/Egas Cristovão

DILI, 11 janeiru 2021 (TATOLI)--Ministru Transporte no Komunikasaun, José Agostinho da Silva, fó ona autorizasaun ba Prezidente ANC (Autoridade Nacional de Comunicacões), João Olívio Freitas, tama serbisu hala’o knaar hodi hein desizaun finál husi Tribunál.

“Iha tinan liubá kazu kona Prezidente ANC, maibé nia prosesu la’o Tribunál Distritál Dili (TDD) aplika Termu Identidade Rezidénsia (TIR), hafoin ida-ne’e Prezidente ANC halo kedan lisensa anuál ne’ebé hanesan direitu funsionáriu ida-idak nian, lisensa anuál ne’e ramata  iha kinta (07/01) no mai aprezenta-an fali, hahú serbisu iha sesta (8/01),” Ministru José Agostinho, informa ba Agência TATOLI, iha Palásiu Governu, foin lalais ne’e.

Notísia Relevante: Ministru José Agostinho seidauk autoriza prezidente ANC tama servisu

Maibé, Governante ne’e hatutan durante Prezidente ANC ne’e auzénsia ho kazu ne’e, tuir dekretu-lei ANC fó resposabilidade ba prezidente interinu hodi asegura hela funsionamentu normál instituisaun.

Iha prosesu judisiáriu, Ministru José Agostinho dehan bainhira seidauk iha desizaun finál husi TDD, Prezidente ANC atuál ne’e tenke kontinua serbisu.

“Ita hapara ema nia mandatu bainhira ema kondenadu, maibé seidauk kondenadu ha’u hanoin ministériu rasik seidauk iha razaun ruma hapara ema-nia direitu ka serbisu,” nia akresenta

Nune’e, Minsitru ne’e husu Prezidente ANC atu kontinua kolabora ho prosesu judisiáriu to’o rezultadu finál.

“Iha ona rezultadu finál mak sei hatuur  situasaun ne’e loloos katak kondenadu ka livre mak ita foin bele haree, maibé importante parte hotu tenke kolabora ho prosesu ne’e,” nia sujere.

Liuhosi audiénsia julgamentu primeiru interrogatóriu, foin lalais ne’e, iha TDD, liuhosi Juiz titulár hatún desizaun hodi aplika TIR ba João Olivio Freitas, ne’ebé sai arguidu tanba deskonfia envolve iha fornesimentu liña internet ilegál hosi kompaña Elite Computer no operadór Telekomunikasaun Telemor.

Polísia Nasionál Timor-Leste (PNTL) liuhosi Servisu Investigasaun Kriminál (SIC, sigla portugés), kinta (26/11), purvolta tuku 11:00 Otl, halo detensaun ba João Olivio Freitas, tanba deskonfia iha relasaun ho ligasaun internet ilegál ne’ebé durante ne’e komete husi arguidu TVB prinsipál Telekomunikasaun Telemor no arguidu DP nu’udar jestór husi operadór nu’udar jestór prinsipál kompañia Elite Computer.

Autoridade Polísia Timor-Leste hamutuk ho ekipa konjunta diretamente tama ba edifísiu ANC iha Ministériu Transporte no Komunikasaun (MTK) iha Caicoli, Dili, hodi halo buska no detensaun ba Prezidente ANC hodi kumpre mandadu buska, detensaun no apreensaun husi TDD ho NUK 0166/20/PNSIK, nune’e bele submete ba investigasaun no aprezenta ba primeiru julgamentu iha TDD.

Dokumentu sai baze ba SIC hodi halo detensaun ba Prezidente ANC tanba deskonfia halo koordenasaun serbisu ho arguidu jestór prinsipál Elite Computer ho inisiál DP no arguidu jestór prinsipál Telemor ho inisiál TVB, hodi halo fornesimentu internet ilegál foti husi satelite Indonézia ba instituisaun Governu Timor-Leste inklui Komandu Jerál PNTL.

Maski Tribunál aplika ona TIR, maibé hosi parte Ministériu Públiku nu’udar na’in ba asaun penál kontinua rekolla prova nune’e bele aprezenta ba Tribunál iha julgamentu normál iha tempu tuir mai.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here