Melania Fatima do Rego Martins. Imajen/Espesiál

DILI, 11 janeiru 2021 (TATOLI) – Defeza sentrál klube feminina AD. SLB Laulara, Melania Fatima do Rego Martins, mantein joga iha SLB iha jogu Liga Feto Timor (LFT), marsu 2021.

“Tinan ida-ne’e, ha’u nafatin defende ha’u nia klube SLB, laiha hanoin atu muda ba klube seluk, maski kolega seluk hakarak muda ba klube seluk laiha buat ida,”  Melania  hateten  ba Agência Tatoli, ohin, iha edifísiu Federasaun Futeból Timor – Leste (FFTL), Dili.

Nia dehan, kona-ba kontratu hosi klube ba sira seidauk fó sai loloos, maibé nia kontinua hein hodi mantein iha SLB.

Melania nia kontribuisaun ba SLB iha tinan kotuk bainhira LFT hala’o primeiru klube refere konsege hetan kuartu lugar no ba tasa Rosa “Muki” Bonaparte, SLB konsege hetan segundu lugar.

Melania moris iha Dili, 23 setembru 1994, oan hosi Agostinho Mesquita Martins no Rufina Mesquita do Rego Martins.

Bainhira FFTL iha inisiativa kria LFT ba Melania sente orgullu tanba hosi atividade ne’e bele buka fini ba selesaun nasionál no promove feto sira-nia talentu.

Esperiénsia Melania iha mundu futeból

Melania Fatima do Rego Martins. Imajen/Espesiál

Melania, involve iha mundu futeból hahú hosi sentru juveníl 2005 to’o agora. Enkuantu iha 2010, Melania hetan oportunidade hosi Federasaun Futeból Timor – Leste (FFTL) hodi hamutuk ho nia kolega sira reprezenta Timor – Leste hodi ba joga AFF Cup ba-dahuluk iha Filipina.

Iha 2014 Timor-Leste nafatin hetan konvite hodi partisipa iha jogu AFF ba dala rua ne’ebé hala’o iha Tailándia, Melania mós hetan oportunidade hodi partisipa maski la lori vitória mai Timor – Leste, maibé hatudu ba mundu nia matan katak feto Timor mós bele.

Iha  2016, Melania hetan tan oportunidade hodi partisipa iha jogu AFF ba-dala tolu ne’ebé hala’o iha Myanmar.

 “Uluk involve iha futeból ha’u nia papa mak haruka ha’u tama to’o ikus sente ba futeból ne’e di’ak ha’u mantein nafatin to’o ohin loron,”  Melania,  jogadora ho númeru kamizola 9 hosi AD.SLB hateten.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here