Imajen/SECOMS.

DILI, 11 janeiru 2021 (TATOLI)—Governu liuhosi Ministru Administrasaun Estatál (MAE), Miguel Pereira de Carvalho, dezafia administradór foun Munisípiu Lautém atu konsentra nia matenek no abilidade hodi artikula prosesu konstrusaun poder lokál demokrátiku Timor-Leste nian iha nível lokál.

Notísia Relevante: Administradór Domingos Sávio hakarak kontribui dezenvolve Lautém

Miguel Pereira de Carvalho hatutan, serbisu munisipál sira tenke kolabora ba malu no artikula atividade no serbisu administrasaun sentrál hodi promove atuasaun unitária, integrada no koerente administrasaun públika nian hodi ezekuta PEDN, programa Governu, Planu Dezenvolvimentu Munisipál no Planu Asaun Anuál.

“Tanba ne’e mak ha’u hakarak dezafia Administradór fóun Munisípiu Lautém atu konsentra nia matenek no avilidade, hodi artikula prosesu konstrusaun poder lokál demokrátiku Timor-Leste nian iha nível lokál.  Administradór foun tenke promove no insentiva partisipasaun sívika konstrutivu, basá iha ne’e mak ita bele hetan esénsia hosi poder lokál,” Miguel Perreira de Carvalho hateten iha ninia diskuru iha serimónia tomada de pose ba Administradór Lautém, Domingos Sávio, ne’ebé Agência TATOLI asesu, segunda ne’e,

Governante ne’e hatutan, ida ne’e mós seidauk kompleta governasaun lokál bainhira konsege de’it kria órgaun no serbisu sira iha Administrasaun Lokál.

“Seidauk mós kompletu, bainhira ita hakaas-aan de’it ba hetan meiu hirak nesesáriu atu órgaun no serbisu sira bele kumpre sira-nia misaun. Maibé, tenke garante atu populasaun lokál sira bele partisipa hodi envolve-aan iha prosesu identifikasaun ba kestaun hirak ne’ebé mak impede netik ninia dezenvolvimentu no prosperidade,” nia hateten.

MAE hatutan, hatete presiza asegura no esklarese ba komunidade kona-ba kompleksidade Governasaun governasaun nian hodi sira bele hatuur estratejia nesesáriu atu bele ultrapasa hamutuk obstákulu hirak ne’ebé mak identifika ona, fundamentál mak sidadaun munisípiu nian sira, ida-idak bele moris iha dame, promove mútua kompreensaun, promove estabilidade no armonia sosiál iha sira-nia munisípiu rasik.

Tuir polítika Governu ne’e nian, nia dehan, hakarak atu populasaun hosi munisípiu ida-idak bele hamutuk hodi hakaas-aan atu promove dezenvolvimentu no sidadaun sira iha Munisípiu ida-idak bele hasees-aan hosi divizionizmu ka fahe-malun ne’ebé la tulun Governu, bainhira hakarak hala’o prosesu dezenvolvimentu iha nível munisípiu no iha nível nasionál.

“Divizionizmu lori de’it rezultadu negativu mai dezenvolvimentu no hakarak de’it atu enfrakese ita-nia nasaun,” nia hateten.

Ministru ne’e sujere, bainhira atu formula planu dezenvolvimentu munisipál nian tenke buka hakaas-aan atu buka dalan diálogu hodi bele hetan konsensu katak tenke refleta vontade komun atu identifika no buka solusaun ba problema hirak ne’ebé mosu iha populasaun nia leet.

“Bainhira ita fahe ita-nia vontade di’ak ho sidadaun sira, atu sira mós bele banati tuir polítika Governu nian mak ida-ne’e ita presiza kadi kakutak hodi hasoru moris loro-loron nian,” Miguel subliña.

Tanba ne’e, governante ne’e enkoraja administradór foun Munisípiu Lautem nian atu mantein pozisaun hanesan líder iha povu nia leet.

“Ha’u enkoraja atu administradór foun Munisípiu Lautem nian  no lideransa komunitária sira atu matein imi-nia pozisaun hanesan lider. Katak, maske serbisu sira-ne’ebé ita-boot sira atu hala’o ne’e todan no ezijente maibé ita-boot bele konta ho apoiu Governu sentrál nian. Labele haluha koopera ho parte hirak ne’ebé hakarak kontribui ho apoiu ho sira-nia dedikasaun no profisionalizmu liuliu funsionáriu públiku, xefe no dirijente sira iha munisípiu ne’e, ne’ebe prontu atu tulun ita-boot bainhira ita-boot presiza atu kumpre ita-boot nia misaun to’o mandatu ramata,” nia enkoraza.

Governante ne’e dezafia komponente hotu iha Munisípiu Lautém ho lideransa administradór foun hodi implementa prinsípiu governasaun di’ak nian iha atuasaun administrasaun lokál Estadu iha Munisípiu Lautém. 

Eis diretór Jerál MAE ne’e mós laran metin no tau konfiansa tomak ba administradór foun Lautem sei dezenvolve di’ak liután munisípiu ne’e durante nia mandate tomak.

“Ha’u laran metin ho matenek no esperiénsia ne’ebé administradór fóun munisípiu nian, bele konta ho apoiu hosi populasaun munisípiu, hosi lideransa komunitáriu sira no mós komponente hotu iha Lautém hodi dezenvolve munisípiu ne’e,” nai dehan.

Iha ámbitu pose ba Administradór foun, Ministru kontinua dezeju no agradese ba Administradór sesante katak sai nafatin naroman iha fatin seluk ne’ebé mak sei iha vontade no hakarak kontinua fó kontribuisaun ba dezenvolvimentu munisipál no nasionál.

Notísia Relevante: Governu fó konfiansa ba administradór foun asume knaar reprezenta Governu lokál

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here