Vise Primeiru-Ministru no Ministru Planu no Ordenamentu, José Maria dos Reis. Imajen TATOLI/Egas Cristovão

DILI, 11 janeiru 2021 (TATOLI)—Vise Primeiru-Ministru no Ministru Planu no Ordenamentu, José Maria dos Reis, hateten relasiona ho rekualifikasaun Aeroportu Prezidente Prezidente Nicolau Lobato, Comoro, Dili, daudaun ne’e ministériu kompetente diskute ona finansiamentu ho finansiadór sira.

Governante ne’e dehan, ekipa resentemente halo ona serbisu atu hamamuk área kontrusaun.

“Ministériu Finansa halo hela enkontru ho ita-nia finansiadór sira atu garante duni finansiamentu ida ba iha kontrusaun rekualifikasaun ba Aeroportu Prezidente Nicolau Lobato,” Ministru José Maria relata hafoin ramata reuniaun semanál ho Primeiru-Ministru, Taur Matan Ruak, iha Palásiu Governu, segunda ne’e.

Notísia Relevante: Ekipa tékniku kontinua aselera prosesu konstrusaun Aeroportu Comoro

Kona-ba atu muda sai komunidade iha área konstrusaun, ekipa tékniku daudaun halo hela levantamentu.

Entretantu, VIII Governu Konstitusionál liuhosi ekipa tékniku liña ministériál hahú esforsu maka’as atu aselera no finaliza planu mestre hodi bele hahú konstrusaun Aeroportu Dili.

Orsamentu ba konstrusaun Aeroportu Internasionál ne’e husi impréstimu Banku Dezenvolvimentu Aziátiku (ADB, sigla inglés) hamutuk millaun $100 no Governu mós aloka ona millaun $30, tanba konstrusaun aeroportu ne’e sei presiza millaun $480.

Antes ne’e, Governu Japaun hatudu kompromisu atu apoia orsamentu millaun $44 hodi konstrui aeroportu ba komponente lima hanesan terminál ba passajeiru, tore kontrolu, tax way (fatin impostu), access road (asesu rodovia) no fatin para aviaun.

Governu Timor-Leste sei halo konstrusaun ba estensaun pista to’o kilometru tolu tuir planu asaun VIII Governu rasik no tuir planu konstrusaun ne’e sei termina iha tinan-tolu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here