Ekipa CAC hasoru malu ho Primeiru-Ministru, Taur Matan Ruak, iha Palásiu Governu, segunda (11/01). Imajen TATOLI/Egas Cristovão

DILI, 11 janeiru 2021 (TATOLI)–Komisaun Antí-Korrupsaun (CAC, sigla portugés) lideradu husi Komisáriu Sergio Hornai, akompaña mós husi adjuntu, hasoru malu ho Primeiru-Ministru (PM), Taur Matan Ruak, hodi relata progresu serbisu.

“Ami hasoru Primeiru-Ministru hodi partilla informasaun balun, liuliu serbisu CAC durante tinan 2020 hodi hametin iha nível polítika prevensaun ninian no mós polítika investigasaun ba korrupsaun,” Komisáriu CAC, informa hafoin reuniaun iha Palásiu Governu, segunda ne’e.

Biban ne’e, ekipa CAC troka mós ideia no hanoin balun ho Xefe Governu relativamente ba Planu Estratéjiku instituisaun ne’ebé publika ona no sai hanesan vizaun ida ba dezenvolvimentu institusionál.

Aleinde ne’e, informa mós atividade sira ne’ebé halo iha tinan 2021 no saida maka seidauk finaliza, liliu ba Cesta Bázika ka subsídiu sira ne’ebé Governu atribui tiha ona ba benefisiáriu sira.

“Haree ba progresu, dezafiu no obstákulu balun iha hela maibé buka nafatin oinsá atubele troka informasaun sira iha dezenvolvimentu institusionál nian atubele halo melloramentu di’ak liuliu iha parte prevensaun ho ezekutivu no mós halo serbisu ne’ebé liga ho instituisaun seluk ninia knaar.

Xefe Governu rekomenda ba CAC, iha ámbitu implementasaun Cesta Bázika nafatin serbisu ba iha prevensaun tuir natureza instituisaun liuliu halo polítika prevensaun, apoiu nafatin liña ministeriál halo melloramentu ba buat balun ne’ebé sai hanesan fukun iha oin atu hadi’a, nune’e to’o benefisiáriu sira iha duni direitu atubele elizível simu distribuisaun produtu.

Kestaun sira ne’ebé maka sei sujeita ba natureza investigasaun nian, sei serbisu ho silensiedade no determinasaun ho objetivu asegura legalidade prestasaun sira.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here