Komísariu CAC, Sergio Hornai. Imajen TATOLI/Egas Cristovão

DILI, 11 janeiru 2021 (TATOLI)—Iha tinan 2020, Komisaun Antí-Korrupsaun (CAC, sigla portugés) halo investigasaun ba kazu korrupsaun hamutuk 73 no prosesu 43 remesa ona ba Ministériu Públiku ho finalidade bele hadi’a no bele halo ona akuzasaun ba Tribunál.

“Kazu pur volta 30 prosesu mak sei iha hela prosesu investigasaun, tanba mai ho komplesidade no kuidadu atu nune’e kuandu rekolla ou apura matéria faktu sira ne’e bele prienxe duni legalidade ne’ebé Lei eziji,” Komisáriu CAC, Sergio Hornai, relata hafoin reuniaun ho Primeiru-Ministru, Taur Matan Ruak, iha Palásiu Governu, segunda ne’e.

Aleinde ne’e, CAC mós halo progresu, liuliu hametin dezenvolvimentu institusionál, serbisu kooperasaun, prosesu investigasaun kriminál, ne’ebé iha tinan 2020 bele prodús investigasaun lubuk ida no bele halo submisaun ba Ministériu Públiku.

“Maski nune’e, ami iha nafatin iha dezafiu no obstákulu sira ne’ebé hanesan institusaun presiza halo nafatin melloramentu,” Komisáriu CAC akresenta.

CAC halo investigasaun bazeia ba Lei númeru 8/2009, ne’ebé iha tinan 2020 nia laran domina ho partisipasaun ekonómiku, abuzu poder no pekulatu.

Kazu hirak ne’e envolve autoridade sira ne’ebé mak iha poder, liuliu iha liña ministeriál no mós instituisaun Estadu Sira.

Jornalista: Antónia Gusmão

Editora: Julia Chatarina

 

HAKEREK NO HATÁN

Please enter your comment!
Please enter your name here