Expedito dias Ximenes. Imajen/Espesiál.

DILI, 11 janeiru 2020 (TATOLI)—Prezidente Parlamentu Nasionál, Deputadu Aniceto Longuinhos Guterres Lopes, deside adia eleisaun ba membru Conselho de Imprensa (CI) tanba bankada Frente Revolusionária Timor-Leste Independente (FRETILIN) retira kandidatu ne’ebé kualidade nu’udar jurista.

Notísia Relevante: PN sei realiza eleisaun ba membru Conselho de Imprensa

Tanba tuir lei Komuniasaun Sosiál Nú. 5/2014, 19 novembru, artigu 45 (Kompozisaun Konsellu Imprensa) alínea c hateten, sidadaun na’in-rua ne’ebé ho kapasidade be ema hotu hatene no iha méritu profisionál ho preferénsia ne’ebé hatutan ba komunikasaun sosiál, hosi sira na’in-rua ida nu’udar jurista, ne’ebé Parlamentu Nasionál hili no ida esperiénsia iha área jornalizmu nian.

Entretantu Bankada Partido Libertação Popular (PLP) propoin Jordão Anteiro Henrique Marques, bankada Kmanek Haburas Unidade Nacional Timor Oan (KHUNTO) no Bankada parlamentár Congresso Nacional de Reconstrução de Timorense (CNRT) propoin Expedito dias Ximenes, Bankada Frente Revolucionária de Timor-Leste Independente (FRETILIN) propoin Maria Bere maibé retirada.

Bankada Bankada UDT/FM propoin Deonaia da Silva Prego maibé la prenxe rekizitu tanba kandidadtu refere nu’udar funsionariu públiku iha Sekretária Estadu Komunikasaun Sosiál (SECOMS).

Aniceto Guterres dehan, kandidatu Deonaia da Silva Prego la prienxe rekizitu tuir lei haruka tanba funsionáriu permanente iha SECOMS tanba ne’e meza deside elimina kedas kandidatu ida-ne’e.

“Bankada FRETILIN deside retira ami-nia kandidatura ba membru Conselho de Imprensa, ami husu deskulpa ba nia,” Xefe Bankada FRETILIN, Deputadu Francisco Miranda Branco, deklara liuhosi plenária, segunda ne’e.

Nune’e mós, Xefe Bankada KHUNTO, Deputada Olinda Guterres, informa ba plenária katak sira-nia kandidatura segredu, ne’ebé aprezenta ona ho konfidensialidade ba meza prezidénsia.

Maibé Vise-Xefe Bankada PLP, Deputadu Francisco de Vasconselos, ejize bankada KHUNTO tenke deklara kandidatura ne’e liuhosi plenária no labele halo kandidatura ne’e sai hanesan segredu fali.

“Tenke deklara. Kandidatura ne’e sé tenke deklara, nune’e klareza tanba antes ne”e KHUNTO retira tiha ona kandidatu ida,” Vise-Xefe Bankada PLP ne’e fó hanoin ba bankada KHUNTO.

Nune’e Deputada Olinda Guterres mós deklara katak KHUNTO nia kandidatura mak Expedito dias Ximenes, hanesan mós kandidatura bankada CNRT nian.

“Ami enkontru ho ami-nia konselleiru superiór propoin Expedito dias Ximenes. Ami-nia kandidatura mak naran ha’u temi ba ne’e,” Xefe Bankada KHUNTO ne’e deklara.

Iha fatin hanesan, Deputadu bankada CNRT, Adérito Hugo da Costa, fó hanoin katak ema ne’ebé parlamentu atu hili ne’e tenke bazeia ba estatutu Conselho de Imprensa (CI) nian.

Entretantu, Prezidente Parlamentu Nasionál, Aniceto Guterres Longuinhos Lopes, fó tempu ba bankada parlamentár sira atu hatama kandidatura kualidade nu’udar jurista ho tempu loron hitu.

“Ha’u hanoin ida-ne’e prazu másimu ona, ita hotu konkorda adia eleisaun ne’e ba segunda-feira,” Aniceto Guterres hateten.

Notísia Relevante: PN Sei Hala’o Eleisaun Ba Membru CI, CNRT Propoin Expedito Dias Ximenes

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here