Diretor Operasaun AIFAESA. Imajen TATOLI/Antónia Gusmão

DILI, 11 janeiru 2021 (TATOLI)–Diretór Operasaun Autoridade Inspesaun no Fiskalizasaun Atividade Ekonómika no Sanitária (AIFAESA), Gabriel da Costa, informa autoridade ne’e simu ona informasaun hosi komunidade munisípiu relasiona ho folin foos.

“Durante loron boot, AIFAESA hetan keixa ida hosi komunidade liuhosi telefone, hosi munisípiu Baucau kona-ba folin foos,” Diretór Operasaun ba Agência TATOLI, segunda ne’e.

Ho informasaun ne’e, AIFAESA preparadu desloka atu halo inspesaun no konfirma folin sasán, liuliu foos.

“Ami sei serbisu hamutuk ho autoridade seguransa Baucau, hodi fó seguransa bainira halo atuasaun, nune’e bele haree kompañia sé maka halimar ho folin,” nia akresenta.

Kona-ba folin foos iha Dili, autoridade ne’e observa katak normál, maski sasán balun folin sa’e maibé ladún maka’as.

“Iha kapitál Dili, to’o agora seidauk iha informasaun ka keixa kona-ba reklamasaun ruma hosi ita-nia komunidade sira mai AIFAESA. Presu iha Dili to’o agora, tuir ami-nia haree la’o normál, ema hasa’e maka hosi $0.50 ba $1, la liu ida-ne’e, ne’ebé ema hasa’e tanba impostu, ita haree katak agora ne’e iha mundu enfrenta hela situasaun pandemia COVID-19,” nia hatutan.

Distributór hotu fó hatene ona AIFAESA razaun hasa’e folin, tanba folin hosi nasaun orijen ne’ebé importa foos ho folin a’as, tanba ne’e foos ho kilograma 25 ne’ebé bain-bain ho folin $9.50 to’o $11.50, sira tenke hasa’e oituan.

“Ho situasaun sira ne’e maka impostu mós maka’as, entaun sira tenke hasa’e folin hotu, maibé la liu $0.25 to’o $1. To’o agora folin iha Dili laran la’o normál hela bazeia ba ita-nia situasaun mundu globál, ne’ebé haree katak ita hotu kona impaktu COVID-19,” Diretór Operasaun ne’e dehan.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here