Ekipa kompañia Seara fahe materiál ba kbiit laek sira, iha suku Tutuala, sábadu (09/01). Imajen TATOLI/Natalino Costa

LAUTÉM, 09 janeiru 2021 (TATOLI)–Kompañia brazileiru, Seara, hamutuk ho Quilina Lucky Market, ho koordenasaun Fundasaun Nino Konis Santana, ho vontade tomak no fuan, fahe kulsaun ba kbiit laek sira iha suku Tutuala, postu administrativu Tutuala, munisípiu Lautém.

Hafoin entega materiál, Jestór Lojístika husi Quilina Lucky Market, Yasintha Sarmento Lee, hateten atividade ne’e hanesan asaun umanitária ida atu fó solidaridade ba maluk sira ne’ebé presiza tulun.

“Apoiu ida-ne’e husi kompañia Seara, liuhosi ami-nia kompañia, maibé tanba ami buka ema kbiit laek ladún hatene, entaun ami liu fali Fundasaun Nino Konis Santana. Sira maka halo koordenasaun ho autoridade suku sira iha ne’e no lori ami mai ohin halo distribuisaun materiál sira iha fatin ne’e,” Jestór Lojístika ne’e informa ba Agência TATOLI, hafoin atividade fahe materiál ba komunidade sira iha suku Tutuala, sábadu ne’e.

Ajudu ne’e iha suku Tutuala rasik, inklui suku no aldeia sira iha Lautém hanesan Petileti, Loro, Vero, Chailoro, Porlamono Loiqueiro, Poros, So Mocho, Sepelata, Ira-Lafai, Luarai Bauro, Natura, Ira-Ara, Asalaino, Titilari no Maulo.

Ekipa kompañia Seara fahe materiál ba kbiit laek sira, iha suku Tutuala, sábadu (09/01). Imajen TATOLI/Natalino Costa

Fundasaun Nino Konis Santana hamutuk ho xefe suku sira halo identifikasaun ba komunidade ne’ebé presiza tulun iha Tutuala.

“Autoridade suku sei prepara tan dadus. Ami promete sei eforsu distribui, nune’e ita-nia komunidade kbiit laek bele hetan hotu. Ami mós promete katak atividade hanesan ne’e sei la para no sei kontinua nafatin ba fatin seluk hodi tulun ita-nia maluk kbiit laek sira ne’ebé presiza,” nia akresenta.

Biban ne’e, jerente kompañia agradese autoridade lokál ne’ebé bele koopera ho di’ak no simu apoiu ne’e.

“Ha’u agradese tebes inan aman sira, xefe suku no xefe aldeia sira, tanba bele simu ona ami ho di’ak tebes, ami la mai ho buat boot maibé inan aman sira simu ho kontente, ida-ne’e halo ami mós kontente, dala ida tan obrigadu,” tenik  Yasintha Sarmento.

Iha fatin hanesan hanesan, Xefe aldeia Chailoro, suku Tutuala, Jeremias Menezes, apresia vontade kompañia Seara tanba ho fuan boot liuhosi Fundasaun Nino Konis Santana bele ajuda komunidade kbiit laek sira.

“Apoiu ne’e ba dala-rua ona no ami kontente nu’udar Xefe aldeia hakarak hato’o obrigadu ba Seara,” nia agradese.

Nune’e mós, Benefisiáriu husi aldeia Petileti, suku Tutuala, Cristina dos Santos, agradese ajudu ne’e no husu kompañia kontinua atividade ne’e tanba iha maluk barak maka presiza.

Enkuantu, hafoin fahe iha suku Tutuala, postu Administrativu Tutuala, atividade ne’e sei kontinua fali iha domingu (10/01) iha suku no aldeia iha Lautém.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here