Diretór Jerál AA/Alfándega, José António Fátima Abílio. Imajen TATOLI/Jogerjo Guterres

DILI, 08 janeiru 2021 (TATOLI)—Iha tinan 2020 nia laran, Autoridade Aduaneira (AA)//Alfándega rekolla reseita hamutuk $65.360.422,90, ne’ebé tun oituan kompara ho tinan 2018 rekolla reseita ho valór millaun $68,3, enkuantu iha tinan 2019 reseita tun ba millaun millaun $68.

Diretór Jerál AA/Alfándega, José António Fátima Abílio, hateten reseita sira ne’e kompostu hosi taxa importasaun $12.989.931,78, taxa seletivu konsumu $36.971.555,28, impostu sobre venda $14.538.092,47, penalidade $609.559,24, fee sira seluk hamutuk $63.069,99 no custom duties $188.214,14, nune’e totál hamutuk $65.360.422,90.

“Iha tinan 2020 enfrenta COVID-19 maibé servisu alfandegáriu kontinua arrekada reseita nafatin ba Estadu, maski hosi transporte terrestre no aérea, iha de’it atividade kargu enkuantu komersiál sira lae, maibé hosi marítima la’o nafatin,” Diretór Jerál ne’e informa ba Agência TATOLI, iha ninia knaar fatin, Palásiu Governu, sesta ne’e.

Nia hatutan, reseita sira ne’e Alfándega rekolla hahú hosi fulan-janeiru to’o dezembru 2020, ne’ebé kobre hosi fronteira sira hanesan Autoridade Portuáriu Timor-Leste (APORTIL), Aeroportu, no fronteira terrestre (Batugade no Salele).

“Reseita sira ne’e boot liu mak hosi taxa seletivu konsumu, tanba ne’e liga ho mina, nune’e mós tua manas no tabaku. Produtu sira ne’e mak halo taxa ne’e boot,” Responsável ne’e haktuir.

Entretantu, hosi fulan janeiru to’o agostu rejista reseita hamutuk millaun $40,7, durante krize pandemia no períodu Estadu Emerjénsia

Jornalista: Antónia Gusmão

Editora: Julia Chatarina  

HAKEREK NO HATÁN

Please enter your comment!
Please enter your name here