Sidadaun Indonézia hamutuk 118 halo check in iha Aeroportu Internasional Prezidente Nicolao Lobato hodi fila ba sira-nia rain, sesta (08/01). Imajen TATOLI/António Gonçalves

DILI, 08 janeiru 2021 (TATOLI)Governu Indonézia liuhosi Embaixada iha Timor-Leste, repatria sira-nia sidadaun iha Dili ho Nam Air, ne’ebé to’o iha Aeroportu Internasionál Prezidente Nicolau Lobato, Comoro, iha tuku 12:45 no aranka iha tuku 13:30.

“Embaixada Indonézia (KBRI-Kedutaan Besar Republik Indonesia) repatria sidadaun, ne’ebé durante ne’e hela iha Dili hamutuk na’in-118 hosi Dili bá Kupang, ne’ebé hosi totál ne’e, na’in-80 sei bá Jawa no seluk sei hela iha Timór Osidentál no Bali,” refere nota komunikadu ne’ebé Agência TATOLI asesu liuhosi KBRI, Dili, sesta ne’e.

Sidadaun 118 durante ne’e hela iha Timór no maioria serbisu iha parte migrasaun iha Embaixada Indonézia no seluk serbisu iha área konstrusaun, médiku, karpinteiru, funsionáriu kompañia, negosiante no emprezáriu sira.

Aviaun ne’ebé tula pasajeiru hanesan charter flight hosi sidadaun sira rasik, tanba aviaun komersiál provizóriu la halo operasaun iha Timor-Leste kauza hosi Estadu Emerjénsia iha ámbitu COVID-19.

“Objetivu hosi repatrisaun sidadaun sira ne’e, balun atu ba vizita sira-nia família tanba haree katak desde pandemia globál, sidadaun sira ne’e la fila bá sira-nia rai no balun foti férias hosi serbisu,” esplika nota ne’e.

Voo ne’e rasik, parte KBRI halo koodenasaun ho Governu Timor-Leste no bainhira sidadaun sira ne’e to’o iha Kupang, forsa tarefa prevensaun COVID-19 Timór Osidentál sei halo teste ba sidadaun sira.

“Bazeia ba despaisu númeru 4/2020 kona-ba regra protokolu saúde iha ámbitu pandemia, bainhira sidadaun sira to’o iha Kupang sei kumpre kuarentena loron-lima, hafoin sei halo teste PCR (swab) COVID-19, hodi hatene katak sidadaun ne’ebé repatria sira ho rezultadu negativu ba vírus hafoin hela iha kuarentena no bele fila ba fatin destinasaun ida-idak,” subliña komunikadu hosi KBRI.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here