Plenária Parlamento Nasionál. Imajen TATOLI/Egas Cristovão.

DILI, 08 janeiru 2021 (TATOLI)—Prezidente Parlamentu Nasionál (PPN), Deputadu Aniceto Longuinhos Guterres Lopes, husu preziedente Komisaun Espesializada Permanente (KEP) sira atu prepara atividade anuál.

“Komisaun Espesializada Permanente (KEP) sira atu prepara atividade anuál, hodi nune’e konklui iha orsamentu 2021 hodi halo fiskalizasaun,” Portavós atuál Sekretária Meza Parlamentu Nasionál, Deputada Lídia dos Santos Martins, informa liuhosi konferénsia imprensa, iha sala konferénsia Parlamentu Nasionál, sesta ne’e.

Prezidente Parlamentu Nasionál fó instrusaun ne’e liuhosi reuniaun bankada parlamentár ne’ebé hala’o iha loron 04 janeiru liubá.

Entretantu, Prezidente Komisaun D (Ekonomia no Dezenvolvimentu), Deputadu Antoninho Bianco, hateten planu atividade anuál ne’e importante tanba ne’e presiza aprova kalendáriu nível komisaun nian.

“Fiskalizasaun ne’e tuir lei haruka. Agora, ami-nia projetu-lei ne’ebé sei halo debate kontinuasaun mak projetu-lei kódigu mineiru nune’e bele hetan aprovasaun iha espesialidade hodi bele regula rikusoin mineral sira iha laran,” nia dehan. 

Prezidente Komisaun ne’ebé trata auntu Ekonomia no Dezenvolvimentu ne’e espera iha espesialidade mós sei hetan unanimidade tanba atu dada investidór mai Timor-Leste.

Deputadu Antoninho Bianco fó-sai katak, kontinuasaun diskusaun ba espesialidade sei akontese iha fulan ida-ne’e.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here