Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu. Imajen Tatoli/António Gonçalves

DILI, 08 janeiru 2020 (TATOLI)—Governu liuhosi reuniaun Konsellu-Ministru, sesta ne’e, halo diskusaun ba planu sosa ai-moruk AstraZeneca hodi halo vasinasaun ba prevensaun COVID-19 iha Timor-Leste.

Ministra Saúde, Odete Maria Freitas Belo, hateten sira aprezenta planu ne’e no hetan ona diskusaun tanba ne’e, Governu kompromete sei sosa iha tempu badak.

Notísia Relevante:MS sei aprezenta planu sosa AstraZeneca ba KM

“Ami aprezenta planu ba Konsellu-Ministru kona-ba kontra vasinasaun no distribuisaun vasinasaun AstraZeneca no tuir planu katak sei to’o mai ita nia rain  tanba ita seidauk iha fábrika  maibé ita sei hetan vasinasaun ne’e iha meadu fulan-juñu,’’ Governante ne’e hateten ba jornalista sira iha Palacio do Governo Dili, sesta ne’e.

Odete haktuir maski Ministru-sira halo ona diskusaun, maibé seidauk aprova verba orsamentu hira maka sei aloka ba planu sosa medikamentu ne’e.

Antes atu implementa programa vasinasaun ne’e, nia dehan Ministériu Saúde sei koopera ho liña ministeriál hodi sensibiliza informasaun ba públiku kona-ba efeitu no vantazen husi programa vasina AstraZeneca.

“Bainhira vasina ne’e to’o ita sei vasina uluk ba liña frente sira ne’ebé mak  kontaktu pasiente  no mós servisu iha grupu nia laran inklui mós ita boot sira jornalista ida ne’e mak  sai grupu alvu atu simu uluk vasinasaun,”nia hateten.

Pesoál Saúde, FALINTIL-Forsa Defeza Timor-Leste (F-FDTL), Polisia Nasionál Timor-Leste (PNTL), jornalista no seluk tan mak alvú dahuluk atu hetan vasinasaun.

Entretantu, Universidade Oxford Englatera maka dezenvolve vasina AstraZeneca ba prevensaun COVID-19.

Notísia Relevante:Prevene COVID-19, TL sei implementa vasina AstraZeneca ba ema hotu

Jornalista : Felicidade Ximenes

Editór:Agapito dos Santos

HAKEREK NO HATÁN

Please enter your comment!
Please enter your name here