Vise-Ministru Interiór, António Armindo, ho kometiva vizita Atauro, kinta (07/01). Imajen/MI

DILI, 08 janeiru 2021 (TATOLI)-Ministériu Interiór (MI) sei monta postu Unidade Polísia Marítima (UPM) no postu vijilánsia Unidade Patrullamentu Fronteira (UPF) iha Aldeia Waruana – Akrema, Suku Biqueli, Postu Administrativu Atauro, Munisípiu Dili.

Komunikadu imprensa ne’ebé Agência Tatoli asesu, sesta ne’e, informa Vise-Ministru Interiór, António Armindo hamutuk ho komitiva, halo vizita bá illa Atauro hodi identifika fatin bá instalasaun postu UPM no postu vijilánsia UPF iha Atauro, kinta (07/01).

Vise-Ministru Interiór, António Armindo ho kometiva observa terrenu atu monta postu UPM ho UPF iha Atauro. Imajen/MI

Tuir Vise-Ministru Interiór, António Armindo, hateten iha tempu besik sei instala postu foun hodi kontrola atividade krime organizadu sira, inklui kontrabandu no atividade sira seluk ne’ebé rejista tiha ona.

“Ida ne’e foin primeira vez ita halo vizita mai iha Atauro hodi observa kondisaun báziku membru UPM no edifísiu eskuadra Atauro inklui identifika fatin hodi harii postu bá UPF no UPM,”  hateten  Vise-Ministru Interiór, António Armindo, durante vizita iha Suku Biqueli, Atauro.

Nia esplika katak Governu nafatin tau prioridade uluk ba infraestrutura PNTL tomak, maske sei halo fazeadamente.

Vizita Vise-Ministru Interiór nian ne’e hetan akompañamentu hosi komandante UPM, Superintendente Basilio de Jesus, reprezentante Komandu Jerál PNTL, Superintendente Xefe polísia Carlos Jerónimo no mós ekipa tékniku sira hosi Gabinete Primeiru-Ministru nian.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here