DILI, 08 janeiru 2021 (TATOLI)-Ho tempu udan-boot, ikus-ikus ne’e, Governu liuhosi Sekretaria Estadu Protesaun Sivíl (SEPS) bolu atensaun bá povu tomak kuidadu ho dezastre naturaís ne’ebé bele akontese bainhira de’it.
Notísia Relevante : SEPS distribui apoiu emerjénsia bá família 26
“Alerta ba komunidade ne’ebé oras ne’e moris iha fatin risku dezastre nian hanesan hela besik iha foho-lolon, mota-ninin no tasi-ibun, karik udan tau maka’as liu oras ida, atensaun tanba bele mosu dezastre naturaís,” afirma Sekretáriu Estadu Joaquim José Gusmão dos Reis, ohin, iha ámbitu distribuisaun apoiu emerjénsia ba família afetadu dezastre naturaís iha Suku Camea, Dili.
Nia hateten, bainhira akontese situasaun dezastre sira ne’ebé la espera atu komunika direita ba sentru operasaun bombeiru, protesaun sivíl, atu bele fó apoiu intervensaun direita .
“Partisipasaun hosi komunidade importante tebes bá fó informasaun bá ekipa jestaun risku dezastre no mós ekipa operasaun nian, karik iha situasaun ruma mosu nune’e hodi bele salva sasán no ita nia-vida,” nia hateten.
Sekretáriu Estadu Joaquim Gusmão, husu bá lider komunitáriu hotu no komunidade ein-jenerál iha territóriu atu organiza malu hamoos ezgotu boot sira ne’ebé mak iha, nune’e bee-dalan bele la’o ho di’ak atu la bele sulin tama bá komunidade nia horik fatin.
Jornalista : Nelson de Sousa
Editór : Francisco Simões
