Ministru Petróleu no Minerál, Víctor da Conceição Soares. Imajen TATOLI/Egas Cristovão

DILI, 08 janeiru 2021 (TATOLI)–Governu liuhosi Ministériu Petróleu no Minerál (MPM) apresia tebes inisiativa empreza Santos investe iha atividade petrolífera iha kampu Bayu-undan.

Hafoin Governu liuhosi MPM no Autoridade Nasionál Petróleu no Minerál (ANPM) aprova pedidu Santos liuhosi analiza tékniku no komésiál foin lalais ne’e, empreza Santos mai ho konklusaun no deside hakarak halo investimentu ho valór $235 hodi fura posu tolu iha kampu Bayu-undan.

“Finalmente iha tinan ne’e sira deside halo perfurasaun postu tolu iha kampu Bayu-undan tanba posu ezistente ladún iha produsaun ona. Governu interese tebes no apoia empreza Santos atu halo perfurasaun,” Ministru Petróleu no Minerál, Víctor da Conceição Soares, hateten, sesta ne’e, iha Palásiu Governu.

Notísia Relevante: Santos deside investe millaun $235 fura mina-matan tolu iha Bayu-undan

Governante ne’e apoia inisiativa ne’e tanba projetu ne’e tanba bele estende tan durasaun tempu operasaun iha Bayu-undan no bele otimiza rekuperasaun hodi fornese valór signifikante ba Timor-Leste.

Kona-ba karta ofisiál hosi empreza Santos ba investimentu, tuir Ministru, ida-ne’e hanesan serbisu parseiru ne’ebé envolve iha kampu Bayu-undan.

ANPM no empreza Santos iha ona estudu ne’ebé hatudu iha potensialidade atu halo perfurasaun atu aumenta reseita ba kofre estadu.

Autoridade halo ona avaliasaun desde inísiu hosi parte komersiál no tékniku, ne’ebé hatudu rezervatóriu ba kapasidade atu prodús.

Durante ne’e, projetu Bayu-undan kontribui ona reseita ba Estadu Timor-Leste, ba fundu mina-rai hamutuk biliaun $20 resin.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here