DILI, 08 janeiru 2020 (TATOLI)—Diretora Eskola Ensinu Báziku Sentrál Fatumeta Dili, Filomena Caldeira Belo, informa eskola ne’e priénse ona padraun ba prevensaun COVID-19 hanesan instalasaun fatin fase liman, uza máskara, garante distánsia fiziku iha sala laran, kria fatin lixu iha sala idaidak, uza dezinfektan.
Aleinde ne’e, iha thermoscan hamutuk rua ne’ebé uza hodi koko temperatura estudante no profesór sira ba prevene transmisaun pandemia globál COVID-19.
Notísia Relevante:EBC Fatumeta simu estudante foun 400-resin
“Bainhira eskola tama ami hatúr balde no sabaun iha sala idaidak para antes tama aula estudante sira fase liman atu nune’e bele prevene moras hotu-hotu, nune’e mós halo dezinfektan ba sala sira bainhira eskola tama filafali maibé ami hein avizu ruma husi Ministériu Edukasaun Munisípiu Dili depois ami halo dezinfektan atu bele prevene COVID-19 mosu iha eskola ne’e,” Ezekutiva ne’e informa ba Tatoli iha ninia servisu fatin Fatumeta Dili, sesta ne’e.
Daudaun ne’e, nia konfesa katak eskola ne’e preparadu atu re-ativa ona prosesu aprendizajen ba estudante sira bainhira Ministériu Edukasaun Juventude no Desportu (MEJD) hasai ona sirkulár hodi re-ativa ona prosesu aprendizajen ba eskola sira.
“Ami halo tuma rua balun dader no balun lokoraik kada sala akumula estudante 25 mak tama semana ida depois semana ida seluk estudante 25 mak tama filafali ida ne’e mak mai-nia orientasaun ba alunu hotu-hotu bele hetan aprendizajen hanesan tanba ne’e mak agora ami sei kontinua filafali hodi aplika ba alunu sira orariu ne’ebé mak ami fó sai antes ona,” nia hateten.
Kona-ba ekipamentu prevensaun COVID-19 iha eskola ne’e sei sufisiente, tanba antes ne’e hetan apoiu husi parseiru internasionál UNICEF iha Timor-Leste.
Notísia Relevante:UNICEF Apoiu Fasilidade Prevensaun COVID-19 ba EESJ 10 Dezembru
Jornalista :Felicidade Ximenes
Editór:Agapito dos Santos
