Ilustrasaun atividade finanseira ilegál. Imajen/Dreamtime

DILI, 08 janeiru 2021 (TATOLI)-Banco Central de Timor-Leste (BCTL) husu ba públiku atu kuidadu ho atividade finaseira ilegál liuhosi plataforma eletrónika tanba bele fó risku osan lakon.

Banku Sentrál bolu atensaun ba kestaun ne’e, tanba ikus ne’e liuhosi rede sosiál hanesan Facebook no WhatsApps, iha publikasaun oin-oin kona-ba atividade finanseira hanesan fó kréditu, seguru, peñor no atividade transfere osan ne’ebé oferese hosi individuu ka kompañia iha rai-laran no mós rai-li’ur.

“Husu ba públiku tenke verifika no identifika didi’ak individuu ka kompañia ne’ebé hakbesik-an ba ita-boot sira ka halo publikasaun liuhosi mídia komunikasaun sosiál sira ho promesa oin-oin, liuhosi husu rai osan, transfere no husu númeru konta bankária, to’o ikus públiku sei lakon osan, tanba laiha ema ida maka sei responsabiliza,” BCTL dehan liuhosi nota ne’ebé Agência TATOLI asesu, sesta ne’e.

Aleinde ne’e, individuu no kompañia hirak ne’e fó promesa oin-oin hanesan kritériu ne’ebé fásil ho montante kréditu boot ho funan ki’ik kompara ho merkadu atuál.

“Ema hirak ne’e ninia objetivu maka atu atrai públiku investe ka rai osan ba atividade ne’ebé pertense ba sira-nia interese rasik no sei tau públiku iha risku finanseiru (lakon osan),” BCTL fó hanoin.

Atividade finanseira hirak ne’e laiha autorizaun hosi Banku Sentrál, ne’ebé haktuir iha artigu 5. J no artigu 31 lei númeru 5/2011, juñu 15, kona-ba Lei Orgániku BCTL, ne’ebé iha responsabilidade eskluzivu hodi regula lisensa, rejistu no supervizaun ba atividade finanseira iha Timor-Leste hodi fó protesaun másima ba interese públiku.

Ho nune’e, BCTL alerta ba públiku tomak hodi labele investe ka rai osan iha entidade ne’ebé maka laiha autorizasaun legál hosi Banku Sentrál hodi hala’o atividade finanseira iha Timor-Leste, ne’ebé ninia lista sei públika iha tempu badak.

Atu proteje públiku hosi risku finanseiru ba hahalok atividade finanseira ilegál, Banku Sentrál husu atu públiku halo vijilansia ba informasaun hirak hanesan tuir mai:

Dahuluk, identifika didi’ak perfíl no legalidade entidade hirak ne’ebé fornese servisu no buka hatene karik hetan ona autorizasaun hodi hala’o atividade, liuhosi dokumentu lisensa hosi BCTL no sertifikadu rejistu komersiál ne’ebé emite hosi Servisu ba Rejistu no Verifikasaun Emprezariál (SERVE).

Daruak, buka hatene didi’ak termu no kondisaun aplikadu ba tipu atividade hirak ne’e, liuliu obrigasaun atu re-embolsa kréditu molok asina kontratu.

Datoluk, evita transfere osan bainhira sei dúvida kona-ba identidade individuu ka kompañia no legalidade.

Dahaat, evita fó  informasaun pesoál hanesan kartaun identifikasaun, númeru konta bankária, PIN ATM no informasaun seluk ne’ebé sei uza hodi esplora públiku ninia interese.

Ikus liu, hakbesik-an ba autoridade kompetente bainhira hetan ameasa ka lakon osan relasaun ho atividade finanseira ilegál hirak ne’e.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here