Komisáriu AA/Alfándega, José António Fátima Abílio. Imajen TATOLI/Jogerjo Guterres

DILI, 08 janeiru 2021 (TATOLI)—Autoridade Aduaneira (AA)/Alfándega iha fulan-dezembru  2020 apreende óleu kontentór haat hamutuk litru millaun 1-resin tanba na’in ba sasán la deklara loloos, bainhira tama hosi Portu Dili no iha maiu apreende tua manas kontentór lima.

“Prosesu administrativu no prosesu legál, ami serbisu hamutuk ho patrimóniu Estadu halo kuaze konklui ona no hein de’it hodi hetan aprovasaun Ministru Finansa, hafoin prosesu krime serbisu hamutuk ho Ministériu Públiku,” Diretór Jerál AA/Alfándega, José António Fátima Abílio, informa ba Agência TATOLI, iha ninia knaar fatin, Palásiu Governu, sesta ne’e.

Aleinde ne’e, autoridade mós halo apreensaun importasaun óleu balun ne’ebé mak la deklara.

“Ne’e konsidera krime, sira ba deklara duni maibé la deklara hotu, atu dehan katak deklara menus ne’e krime, ne’ebé ami prosesa ona, relatóriu konklui ona,” nia akresenta.

Dirijente ne’e dehan, relatóriu apreensaun ba óleu ne’e ekipa investigasaun hato’o ona ba parte kompetente, hafoin bolu ona na’in ba sasán atu selu koima hafoin aplika mós penalidade, ka kuandu lakohi selu submete ba leilaun.

“Ami halo apreensaun hafoin simu informasaun hosi fontes informasaun katak tama iha kanál verde, ne’ebé tuir loloos tenke selu taxa ona bele lori ona sasán, maibé hafoin simu informasaun katak sasán balun na’in la deklara, entaun ami foti desizaun katak bele sai maibé Alfándega segel, hafoin selu kontentór tenke marka prezensa iha Alfándega, kuandu la marka prezensa labele kole,” nia hatutan.

Dirijente ne’e esplika, sasán ne’e tama mai hosi Indonézia to’o iha Portu Dili legál maibé na’in ba sasán ne’e mak deklara menus.

“Sasán sira ne’e kompañia lori sai ba tau iha armajen, maibé kuandu loke tenke prezensa hosi Alfándega no momentu loke ekipa Alfándega marka prezensa no loke hodi haree momentu ne’ebá, nota katak entre kontentór sia ne’e haat mak iha óleu ne’ebé na’in la deklara,” Dirijente ne’e tenik.

Kuandu na’in hakarak direferénsia taxa ne’ebé mak nia la selu, hafoin selu tan penalidade maka bele foti sasán maibé prosesu krime la’o nafatin tanba komete krime fraude fiskál.

Kona-ba tua manas , Diretór Jerál ne’e hateten bebida lori hosi Singapura no bainhira to’o iha Portu Dili, na’in ba sasán ne’e deklara katak la’ós nia mak hatama sasán ne’e mai Timór.

“Tanba ne’e, ekipa Alfándega konsidera hanesan sasán ilegál maka halo apreensaun no submete kedas ba investigasaun. Razaun Alfándega halo apreensaun tanba la tuir regra, ne’ebé bainhira hatama sasán tenke deklara maibé realidade la deklara,” nia haktuir.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here