DILI, 07 janeiru 2021 (TATOLI) -Tribunál Distritál Dili (TDD), kinta ne’e, hala’o julgamentu ba arguidu na’in-rua ho inisiál JH no RTS ne’ebé deskonfia prátika krime importasaun ilísita ka fa’an sigarru ilísitu.
Tuir faktu akuzasaun hosi Ministériu Públiku (MP) bá prosesu ne’e katak, iha loron 22 outubru 2019, ekipa hosi Autoridade Inspesaun Fiskalizasaun Ekonomia no Sanitaria (AIFAESA) hala’o inspesaun ba kioske no loza sira iha area parte Bidau to’o area Becora, Dili mak identifika katak iha arguidu JH nia kioske fa’an tabaku ho marka tembaku Cheg (joker) hamutuk kaixa 10. Tamba ne’e, AIFAESA halo kedas apreensaun ba tabaku sira ne’e.
Iha momentu membru ekipa inspesaun sira hala’o hela inspesaun, arguidu JH mós informa ba membru ekipa sira katak sigarru sira ne’e nia hola hosi arguidu RTS hamutuk dala-lima ka dala-neen ona tanba ne’e ekipa inspesaun AIFAESA kontinua hala’o inspesaun iha arguidu RTS nia fatin, konsege identifika katak arguidu fa’an mós tabaku ilísitu iha ninia fatin ho marka Surya 12 hamutuk slop 80 no tembaku Cheg (joker) hamutuk kaixa-haat no AIFAESA mós halo kedas apreensaun ba sigarru hirak ne’e.
Tuir art. 31″ al. c) no art. 12′ n° 9, husi dekretu lei n° 14/2016, 8 Juñu, konsidera nu’udar produtu tabaku ilísitu ne’ebé proibidu atu sirkula iha merkadoria no importa no sosa merkadoria sira hanesan tabaku mai Timor-Leste, presiza hetan autorizasaun no mós lisensa hosi Ministériu Saúde, no tenke liuhosi autoridade Alfándega, maibé arguidu sira la kumpre ninia obrigasaun hodi viola lei.
MP promove arguidu sira nu’udar autór material ho forma konsumada ba krime importasaun ilísita bá sasán merkadoria ne’ebé previstu no punidu iha art. 315 n. 1. hosi Kódigu Penál.
Hatán ba akuzasaun sira arguidu RTS konsidera akuzasaun MP nian ne’e loos hotu. Nune’e, nia lia tun tan dehan, sigarru hirak ne’e nia parte sosa tutan hosi maluk negosiante na’in-rua iha Delta Dili no sigarru hirak ne’e hatama hosi Indonézia liuhosi fronteira terrestre Motain, Bobonaro.
“Ha’u arrepende ho ha’u nai hahalok ne’e no promete sei la halo tan iha futuru,” deklara arguidu RTS liu hosi julgamentu ne’e.
Prosesu julgamentu ne’e prezide hosi juis prosesu Ivan Suritai, Maria Solana, Ana Paula Fonseca no Ministériu Públiku reprezenta hosi prokuradór Rogeiro Viegas no arguidu hetan asisténsia legal hosi defensór públiku na’in-ida.
Jornalista : Nelson de Sousa
Editór : Francisco Simões
