Komunidade iha suku Comoro, kapitál Dili, troka voucher iha supermerkadu Leader ho produtu Cesta Bázika, kinta (10/12). Imajen TATOLI/António Gonçalves

DILI, 07 janeiru 2021 (TATOLI)--Primeiru Ministru (PM), Taur Matan Ruak, fó ona orientasaun ba ministériu implementadór Cesta Bázika hodi kumpre medida Estadu Emerjénsia (EE) da-siak hodi prevene kontájia pandemia COVID-19.

“Atividade Cesta Bázika bele kontinua, maibé tenke observa atu kumpre medida sira ne’ebé ita fó sai ona”, PM Taur hateten iha Palásiu Prezidensiál, Bairro Pité, kinta ne’e.

Xefe Governu dehan, daudaun ne’e ministériu implementadór sira halo esforsu atu labele hapara totál atividade, ho kondisaun nafatin kumpre regra sira ne’ebé Governu aplika ona.

Notísia Relevante: EE da-siak: viola medida ezekusaun sei asume responsabilidade kriminál

Nune’e, eis Prezidente Repúblika husu ba ministériu implentadór sira atu kontinua observa fatin públiku ne’ebé realiza atividade distribuisaun Cesta Bázika inklui merkadu sira hodi matein medida ijiene iha sosiedade nia leet.

Nune’e mós, ministériu implementadór sira kontinua observa atu kompañia fornesedór sira kontinua distribui hahan saudável ba benefisiáriu sira.

Xefe Ezekutivu nota katak iha EE dahuluk mak hetan akompañamentu hosi entidade relevante, maibé EE daruak to’o da-siak ne’e loloos iha esperiénsia ona atubele iha vontade kumpre medida ijiene.

“Husu ba komunidade hotu, bainhira hala’o atividade labele kria konfusaun ba-an rasik, maibé tenke kumpre nafatin medida ijiene sira hodi prevene kontájia COVID-19,” nia akresenta.

Kona-ba eskola sira, Xefe Governu afirma laiha desizaun ida atu taka, maibé Ministériu Edukasaun Juventude no Desportu (MEJD) hasai sirkular ida atu eskola sira bele kontinua hala’o atividade aprendizajen maibé tenke rigór kumpre medida fase liman bebeik, distánsiamentu sosiál no uza máskara.

Daudaun ne’e parte Ministériu Turizmu, Komérsiu no Indústria (MTKI), ne’ebé resposável ba distribuisaun Cesta Bázika ho modalidade voucher, hahú monotoriza no halo avaliasaun atu hadi’ak liután mekanizmu distirbuisaun hodi kumpre medida EE da-siak ne’ebé mensiona labele halibur ema liu na’in-10 iha fatin ida.

Enkuantu, Governu liuhosi Ministériu Koordenadór Asuntu Ekonómiku (MKAE) husu ba kompañia atu kumpre obrigasaun kontratu fornese ai-han kualidade iha implementasaun programa Governu iha ámbitu rekuperasaun ekonómika.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here