Primeiru-Ministru, Taur Matan Ruak. Imajen TATOLI/Egas Cristovão

DILI, 07 janeiru 2021 (TATOLI)–Primeiru Ministru (PM), Taur Matan Ruak, husu ba sidadaun hotu atu labele fiar informasaun katak Banku Federál la transfere Orsamentu Jerál Estadu (OJE) 2021.

Xefe Governu hato’o kestaun relasiona ho informasaun ne’ebé espalla iha públiku katak Banku Federál Estadu Unidu Amérika (EUA) sei la transfere orsamentu tinan ne’e.

“Uluk dehan OJE 2020 mak la mai, maibé orsamentu ne’e ita ezekuta  hotu tiha ona, ne’ebé ami la keixa dehan osan laiha, ne’ebé ha’u hanoin ita bo’ot sira bele karik rona Primeiru-Ministru, labele rona fali dehan osan laiha ka la mai,” PM Taur, hateten hafoin enkontru ho Prezidente Repúblika, Francisco Guterres ‘Lú-Olo’, iha Palásiu Prezidensiál, Bairro Pité, kinta ne’e.

Notísia Relevante: Konjelamentu FP, “Bainhira BCTL seidauk pronúnsia entaun laiha problema”

Xefe ezekutivu dehan, OJE 2021 promulgadu ona no hein Ministériu Finansa (MF) halo pedidu levantamnetu ba Banku Sentrál Timor-Leste (BCTL, sigla portugés) hodi halo korresponde ho Banku Federál transfere osan mai.

“Kuandu osan la mai ne’e, ami sira ne’e mak hatene uluk, ne’ebé informa ba sidadaun sira labele fiar informasaun seluk,” nia akresenta.

Governu liuhosi MF seidauk husu ba BCTL halo levantamentu fundu petrolíferu hodi sustenta mákina Estadu tanba saldo tezouru sei sufisiente.

Maski iha loron 28 dezembru 2020, Prezidente Repúblika promulga ona OJE 2021, ho montante biliaun $1,895, ne’ebé husi montante ne’e biliaun $1,377 husi fundu petrolíferu no reseita naun petrolíferu millaun $508.

Hosi totál reseita fundu minarai biliaun $1,377, millaun $547 foti bazeia Rendimentu Sustentável Estimadu (RSE) no transferénsia superiór liu RSE millaun $829.

Daudaun likidez ne’ebé iha millaun $325-resin sufisiente atu sustenta mákina Estadu, nune’e seidauk husu ba BCTL atu halo levantamentu no bainhira saldu ne’e tun ba millaun $200 maka sei halo pedidu levantamentu ba Banku Sentrál.

OJE 2021 kompostu hosi saláriu no vensimentu millaun $239,2, bens (sasán) no servisu millaun $421,49, transferénsia públika millaun $669,91, kapitál minór millaun $61,14 no kapitál dezenvolvimentu millaun $503,20.

OJE 2021 integra programa hamutuk 141, sub- programa 431 no totál atividade hamutuk 1.837, Enkuantu tuir Ministru Finansa, pedidu dahuluk OJE 2020 hamutuk millaun $936,3 no levantamentu fundu petrolíferu hamutuk millaun $886,3.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here