Prokuradór Jerál Repúblika, José Ximenes. Imajen Tatoli /Egas Cristovão

DILI, 07 janeiru 2021 (TATOLI)-Ministériu Públiku (MP) liuhosi Servisu Kontensiozu Estadu rejista prosesu kazu hamutuk 188 hosi parte rekerente ne’ebé halo asaun kontra Estadu.

Notísia Relevante : Projetu lei krime sibernétika regula mós utilizasaun mídia sosiál

Asuntu ne’e hato’o hosi Prokuradór Jerál Repúblika (PJR), José Ximenes, ohin, hafoin hala’o enkontru ho Primeiru-Ministru (PM), Taur Matan Ruak, iha Palásiu Governu.

Nia dehan, prosesu ne’e ema halo asaun kontra Estadu hanesan parte vítima no Estadu hanesan autór ka reu iha prosesu ne’ebé Ministériu Públiku mak defende iha Tribunál.

“Ami informa bá Primeiru-Ministru para Governu haree didi’ak uitoan iha area ne’e nune’e oinsá servisu hamutuk ho Ministériu Públiku hodi reforsa MP nia pozisaun bainhira defende Estadu nia interese iha Tribunál sira,’’ José Ximenes hateten.

Nia esplika, asaun sira ne’ebé ema hala’o kontra Estadu iha area barak liu Ministériu Finansas parte reseita ninian, Ministériu Justisa iha Terras no Propriedade liga bá asuntu rai, Komisaun Funsaun Públika ho desizaun disiplinár ho sira seluk.

Iha prosesu ne’e parte rekerente rekorre keixa sira liuhosi prosesu sivíl bá Tribunál tanba sente la satisfás ho desizaun administrativu sira iha ezekutivu nian.

Nia hatutan, kona-bá kestaun defeza MP sempre koopera ho Governu hosi dokumentasaun hodi fornese bá Gabinete Kontensiozu Estadu sai hanesan prova hodi defende Estadu nia interese. Tanba presiza nafatin reforsa koordenasaun bainhira pedidu ruma hatama bá iha instituisaun Estadu ninian hodi fó informasaun didi’ak no kompletu hodi reforsa nune’e labele lakon iha Tribunál.

Jornalista   : Nelson de Sousa

Editór        : Francisco Simões

 

HAKEREK NO HATÁN

Please enter your comment!
Please enter your name here